जळगाव - येथील कोविड रुग्णालयात उपचार घेणारे कोरोनाबाधित रूग्ण व महानगरपालिकेच्या क्वारंटाईन सेंटरमध्ये दाखल असलेल्या संभाव्य कोरोना रुग्णांना सरकारी यंत्रणेच्या हलगर्जीपणामुळे अक्षरशः मरणयातना सहन कराव्या लागत आहेत. कोविड रुग्णालयात उपचार घेणाऱ्या कोरोनाबाधित रुग्णांच्या सुश्रुषेकडे सरकारी डॉक्टर्स आणि आरोग्य सेवेतील कर्मचारी लक्ष देत नसल्याच्या तक्रारी आहेत. क्वारंटाईन सेंटर्सची परिस्थिती देखील वेगळी नाही. याठिकाणी दाखल असलेल्या संशयित रुग्णांच्या वैद्यकीय चाचणीचे अहवाल आठ-आठ दिवस मिळत नाहीत. नाश्ता, जेवण व स्वच्छता अशा सर्व प्रकारच्या गोष्टींविषयी नाराजीचा सूर असल्याची बाब 'ई- टीव्ही भारत'ने केलेल्या पाहणीत समोर आली आहे.
जळगाव जिल्ह्यात कोरोनाचा संसर्ग अतिशय वेगाने फैलावत आहे. सद्यस्थितीत 8 हजारांपेक्षा अधिक कोरोनाबाधित रूग्ण आहेत. जिल्ह्यातील सर्वच 15 तालुक्यांमध्ये दररोज मोठ्या संख्येने रूग्ण आढळत असल्याने आरोग्य यंत्रणेवर मोठा ताण पडत आहे. अशा परिस्थितीत जळगाव शहरातील जिल्हा कोविड रुग्णालय आणि महानगरपालिकेच्या क्वारंटाईन सेंटर व्यतिरिक्त तालुकास्तरावर कोविड आणि क्वारंटाईन सेंटर उभारण्यात आले आहेत. तालुकास्तरावरील अत्यावस्थ स्थितीतील रुग्णांना जिल्हा कोविड रुग्णालयात उपचारासाठी दाखल करण्यात येत आहे. त्यामुळे कोविड रुग्णालयावर सुरुवातीपासून असलेला भार कायम आहे. त्याचप्रमाणे, जळगाव महापालिका क्षेत्रातही मोठ्या संख्येने कोरोनाबाधित रूग्ण आढळत असल्याने महापालिकेच्या कोविड आणि क्वारंटाईन सेंटरचीही हीच परिस्थिती आहे. जळगाव महानगरपालिकेने कोविड सेंटर्ससह 5 ठिकाणी क्वारंटाईन सेंटर्स उभारले आहेत. त्यांची क्षमता सुमारे 600 जणांना क्वारंटाईन करण्याची आहे. कोरोनाबाधित रूग्ण आणि संभाव्य कोरोना रुग्णांची संख्या सातत्याने वाढतच असल्याने आरोग्य यंत्रणेच्या कामावर मोठा परिणाम झाल्याचे पहायला मिळत आहे. कोविड रुग्णालयासह कोविड सेंटर आणि महापालिकेच्या क्वारंटाईन सेंटरमध्ये रुग्णांना सोयीसुविधा मिळण्यासही अडचणी येत आहेत.
कोविड रुग्णालय ठरतेय मृत्यूचे दार -
जळगावातील जिल्हा कोविड रुग्णालयातील सुश्रुषेविषयी कोरोनाबाधित रूग्ण तसेच त्यांच्या नातेवाईकांकडून तक्रारी केल्या जात आहेत. येथील डॉक्टर्स, नर्सेस, सफाई कर्मचारी व्यवस्थित लक्ष देत नसल्याचा आरोप रूग्ण आणि त्यांचे नातेवाईक करत आहेत. कोविड रुग्णालयाची क्षमता 357 खाटांची आहे. त्यातील 55 खाटा आयसीयू वॉर्डात आहेत. मात्र, कोरोनाबाधित रुग्णांची संख्या पाहता या खाटा अपूर्ण पडत आहेत. अशा परिस्थितीत कोविड रुग्णालय प्रशासनाला सतत रुग्णांना कोरोनासाठी अधिग्रहित केलेल्या इतर खासगी रुग्णालयांमध्ये हलवावे लागते. यात रुग्णांसह त्यांच्या नातेवाईकांची फरपट होते. या रुग्णालयात अवघे 55 खाटांचे आयसीयू वॉर्ड असल्याने प्रकृती चिंताजनक असलेल्या रुग्णांना वेळेवर ऑक्सिजन व व्हेंटिलेटर मिळत नाहीत. अनेक रुग्णांचा त्यामुळे मृत्यू झाल्याच्या घटना घडल्या आहेत. कोविड रुग्णालयातील अनेक वॉर्डांमध्ये स्वच्छतेचा प्रश्न गंभीर आहे. याठिकाणी नियमितपणे स्वच्छता होत नाही. शौचालये आणि बाथरूमचीही अवस्था वाईट आहे.
रुग्णांच्या प्रकृतीविषयी माहितीच मिळत नाही -
कोविड रुग्णालयात दाखल असलेल्या रुग्णांच्या प्रकृतीविषयी माहितीच मिळत नसल्याची नातेवाईकांची मुख्य तक्रार आहे. अनेक रूग्ण कोविड रुग्णालयात दाखल करतेवेळी ठणठणीत असतात. परंतु, नंतर त्यांची प्रकृती अधिक बिघडत जाते. अनेक रुग्णांना कोरोना होण्याआधी मधुमेह, उच्चरक्तदाब असे आजार असतात. त्यांना कोरोनासोबत या आजारांची औषधी वेळेवर मिळणे गरजेचे असते. मात्र, रुग्णालयातील डॉक्टर्स, नर्सेस सुश्रुषेकडे लक्ष देत नाही. अनेकदा रुग्णांना तपासणारे डॉक्टर्स कोण? हेच कळत नाही, अशीही रुग्णांच्या नातेवाईकांची तक्रार आहे. मदतीसाठी रुग्णांच्या नातेवाईकांचे भ्रमणध्वनी क्रमांक रुग्णालय प्रशासनाकडून घेतले जातात. मात्र, त्यावर कोणत्याही प्रकारचा संपर्क साधला जात नाही. नातेवाईकांनी संपर्क साधण्याचा प्रयत्न केला तर डॉक्टर्स, नर्सेस अरेरावी करतात. रुग्णांचे नातेवाईक रुग्णालयाबाहेर थांबून असतात. ग्रामीण भागातील लोकांना याचा सर्वाधिक त्रास सहन करावा लागतो. उघड्यावर जेवणे व झोपणे, रात्री-अपरात्री महिलांना देखील अशाच प्रकारे थांबावे लागत आहे.
क्वारंटाईन सेंटरमध्येही गैरसोय -
महानगरपालिकेने कोविड सेंटर्ससह 5 ठिकाणी क्वारंटाईन सेंटर्स उभारले आहेत. त्यांची क्षमता सुमारे 600 जणांना क्वारंटाईन करण्याची आहे. मात्र, याठिकाणी संभाव्य कोरोना रुग्णांना गैरसोयीचा सामना करावा लागत आहे. सर्वात महत्त्वाची बाब म्हणजे, क्वारंटाईन सेंटरमध्ये दाखल संशयित रुग्णांचे कोरोना चाचणीचे अहवाल आठ-आठ दिवस मिळतच नाहीत. त्यामुळे क्वारंटाईन सेंटरमध्ये एखादा पॉझिटिव्ह रूग्ण असेल तर त्याच्यामुळे इतरांना लागण होण्याची भीती निर्माण झाली आहे. महानगरपालिकेच्या कोविड आणि क्वारंटाईन सेंटरमध्ये सुरक्षा व्यवस्थेचा मुख्य प्रश्न आहे. मागील आठवड्यात शासकीय अभियांत्रिकी महाविद्यालयाच्या वसतिगृहातील सेंटरमध्ये दोन रुग्णांनी दारू पिऊन गोंधळ घातला होता. तरीही अद्याप सुरक्षिततेच्या उपाययोजना झालेल्या नाहीत. क्वारंटाईन सेंटरमध्ये नाश्ता, जेवण वेळेवर मिळत नसल्याचीही तक्रार आहे.
प्रशासन म्हणते, उपाययोजना सुरू -
कोविड रुग्णालय तसेच क्वारंटाईन सेंटरच्या तक्रारींबाबत कोविड रुग्णालयाचे अधिष्ठाता डॉ. जयप्रकाश रामानंद यांच्याशी संपर्क साधला असता त्यांनी सांगितले की, सुरुवातीच्या काळात असंख्य अडचणी होत्या. मात्र, हळूहळू मार्ग काढला जात आहे. रुग्णांना येणाऱ्या अडचणी दूर करण्यावर भर दिला जात आहे. कोविड रुग्णालयातील प्रयोगशाळा आणि खासगी लॅब अशा दोन ठिकाणी स्वॅब तपासणीसाठी जातात. खासगी लॅबकडून येणाऱ्या अहवालांना उशीर होतो. काही वेळेला एखाद्या रुग्णाच्या अहवालातून निष्कर्ष काढता येत नाही. अशा वेळी संबंधित रुग्णाचा पुन्हा स्वॅब घ्याव लागतो. त्यामुळे अहवाल येण्यास विलंब होतो. मात्र, असे अपवादात्मक परिस्थिती घडते, असेही डॉ. रामानंद म्हणाले. कोविड रुग्णालय आणि क्वारंटाईन सेंटरमधील जेवणाच्या समस्येवर उपाय म्हणून एक समिती स्थापन केली आहे. ही समिती दररोज रुग्णांना वेळेवर जेवण मिळाले की नाही, जेवणाचा दर्जा कसा होता याची चौकशी करते, असेही त्यांनी सांगितले.
