जळगाव- जिल्ह्यातील कोरोना संसर्गाचा वेग काही प्रमाणात कमी झाल्याचे पाहायला मिळत आहे. नव्याने समोर येणाऱ्या पॉझिटिव्ह रुग्णांच्या तुलनेत कोरोनावर मात करणाऱ्या रुग्णांची संख्या दुपटीने जास्त असल्याचे दिलासादायक चित्र आहे. आरोग्य यंत्रणेच्या परिश्रमाची ही फलश्रुती आहे. सद्यस्थितीत जिल्ह्यातील कोरोनाची परिस्थिती लक्षात घेतली तर जिल्ह्यातील कोरोनाचा रिकव्हरी रेट हा 86.76 इतका आहे. दुसरीकडे, कोरोनाचा मृत्यूदरही 2.44 टक्के इतका खाली आला आहे. जिल्ह्यातील मृत्यूदराचा हाच आकडा एप्रिल ते जून महिन्यापर्यंत तब्बल 12 ते 14 टक्के इतका होता. परंतु, कालांतराने आरोग्य यंत्रणेत झपाट्याने झालेले फेरबदल, उपलब्ध सोयीसुविधांमुळे आता परिस्थिती बदलत आहे.
जळगाव जिल्ह्यात मार्च महिन्याच्या अखेरच्या आठवड्यात पहिला कोरोनाबाधित रुग्ण आढळला होता. हा रुग्ण जळगाव शहरातील होता. त्यानंतर जिल्हाभरात टप्प्याटप्प्याने कोरोनाबाधित रुग्ण समोर येऊ लागले. मे महिन्यात तर कोरोनाने जिल्ह्यातील 15 तालुक्यांमध्ये हातपाय पसरले. जुलै ते ऑगस्ट महिन्यात जळगाव जिल्ह्यातील परिस्थिती हाताबाहेर गेली. जिल्ह्यात सर्वत्र मोठ्या संख्येने नवीन कोरोनाबाधित रुग्ण समोर येऊ लागले. या काळात चिंतेची बाब म्हणजे, कोरोनाचा मृत्युदर देखील वाढताच होता. हजारोंच्या संख्येने कोरोनाबाधित रुग्ण असताना आरोग्य यंत्रणेवर मोठ्या प्रमाणावर ताण पडत होता. मात्र, अशा परिस्थितीत आरोग्य यंत्रणेत जलदगतीने फेरबदल करण्यात आले. आवश्यक ती यंत्रसामग्री तसेच सोयीसुविधा उपलब्ध झाल्याने कोरोनाच्या लढ्यात आरोग्य यंत्रणेला यश येऊ लागले. सद्यस्थितीत कोरोनाचा संसर्ग काही प्रमाणात ओसरला असून, दररोज नव्याने समोर येणाऱ्या पॉझिटिव्ह रुग्णांच्या तुलनेत कोरोनावर मात करणाऱ्या रुग्णांची संख्या अधिक आहे.
जिल्ह्यातील कोरोनाचा रिकव्हरी रेट 85 टक्क्यांहून जास्त आहे. मृत्यूदरही घटला असून, तो आता 2.44 टक्क्यांवर आला आहे. सध्या 5 हजार 272 ऍक्टिव्ह रुग्ण-जळगाव जिल्ह्यात सद्यस्थितीत कोरोनाबाधित रुग्णांची संख्या 48 हजार 806 इतकी आहे. त्यातील 42343 रुग्णांनी कोरोनावर यशस्वीपणे मात केली आहे. जिल्हा कोविड रुग्णालयासह इतर कोविड सेंटर, खासगी रुग्णालये मिळून 5 हजार 272 रुग्णांवर उपचार सुरू आहेत. त्यात 4 हजार 146 रुग्ण कोणतीही लक्षणे नसलेले तर 1 हजार 126 रुग्ण हे लक्षणे असलेले आहेत. त्यातही 202 रुग्णांवर अतिदक्षता विभागात उपचार सुरू आहेत. जिल्ह्यात आतापर्यंत 1 हजार 191 रुग्णांचा कोरोनाने बळी घेतला आहे.
अखेर आरोग्य यंत्रणेच्या प्रयत्नांना यश
सुरुवातीच्या काळात कोरोनाचा संसर्ग वाढत असताना रुग्णांच्या कोरोना चाचणीचे अहवाल चार-चार दिवस प्रलंबित राहत होते. त्यामुळे रुग्णांची ट्रेसिंग लवकर होत नव्हती. मात्र, त्यानंतर राज्य शासनाने जळगाव जिल्ह्यासाठी स्वतंत्र प्रयोगशाळा मंजूर केली. प्रयोगशाळा कार्यान्वित झाल्यानंतर कोरोना चाचणीचे अहवाल येऊ लागले. त्यानंतर जिल्ह्यात ठिकठिकाणी कोविड केअर सेंटर्स, डेडिकेटेड कोविड हॉस्पिटलची उभारणी करण्यात आली. विशेष म्हणजे, जळगाव जिल्हा शासकीय वैद्यकीय महाविद्यालय व रुग्णालय हे विशेष कोविड हॉस्पिटल म्हणून घोषित करून उपाययोजना करण्यात आल्या. बेड्सची संख्या वाढवण्यावर भर देण्यात आला. अशा उपाययोजनांमुळे कोरोनाच्या लढ्यात आरोग्य यंत्रणेला हळूहळू यश येऊ लागले.
सामूहिक प्रयत्नांमुळे बदलली परिस्थिती
जिल्ह्यातील कोरोनाच्या 'रिकव्हरी रेट'बाबत 'ईटीव्ही भारत'शी बोलताना जिल्हा कोविड रुग्णालयाचे अधिष्ठाता डॉ. जयप्रकाश रामानंद म्हणाले, जळगाव जिल्ह्यात सुरुवातीच्या काळात परिस्थिती खूप गंभीर होती. कोरोनाला लढा देण्यासाठी आवश्यक ती यंत्रसामग्री, मनुष्यबळ उपलब्ध नव्हते. त्यानंतर मात्र, राज्य शासनाने पाठबळ दिले. आवश्यक घटक उपलब्ध करून दिले. विशेष म्हणजे, कोरोनाच्या वाढत्या रुग्णांची संख्या लक्षात घेऊन आम्ही कोविड रुग्णालयातील बेडची संख्या वाढवण्यावर भर दिला. सर्व बेड ऑक्सिजन पाईपलाईनने जोडले. शासनाने आवश्यक तेवढे डॉक्टर्स आणि नर्सिंग स्टाफ उपलब्ध करून दिला. जिल्हाधिकाऱ्यांच्या संकल्पनेतून राबवलेली 'बेड साईट असिस्टंट' ही कल्पना देखील कामी आली. जिल्हा प्रशासन आणि आरोग्य यंत्रणेच्या सर्वच अधिकारी व कर्मचाऱ्यांचे सामूहिक प्रयत्न असल्याने हे यश आले आहे, असे डॉ. जयप्रकाश रामानंद यांनी सांगितले.
