जळगाव - राष्ट्रवादी काँग्रेसचे अध्यक्ष आणि माजी केंद्रीय मंत्री शरद पवार यांची दिल्लीतील सुरक्षा केंद्र सरकारने काढून घेतली आहे. या प्रकारामुळे राष्ट्रवादी काँग्रेसचे कार्यकर्ते संतप्त झाले आहेत. राष्ट्रवादी काँग्रेसच्या जळगाव महानगर शाखेच्या वतीने शनिवारी दुपारी 1 वाजता आकाशवाणी चौफुलीवर रास्ता रोको आंदोलन करत केंद्र सरकारच्या भूमिकेचा निषेध नोंदविण्यात आला.
राष्ट्रवादी काँग्रेसचे महानगराध्यक्ष अभिषेक पाटील यांच्या नेतृत्वाखाली हे आंदोलन करण्यात आले. आंदोलनात महिला आघाडीच्या कार्यकर्त्यांनी देखील सहभाग नोंदवला होता. केंद्र सरकारच्या भूमिकेची खिल्ली उडण्यासाठी महिला आघाडीच्या कार्यकर्त्यांनी आंदोलनप्रसंगी थाळीनाद केला. तसेच केंद्र सरकारच्या विरोधात जोरदार घोषणाबाजी करण्यात आली. केंद्र सरकारने शरद पवारांची सुरक्षा सूड भावनेतून काढली आहे. हा निर्णय चुकीचा आहे. त्यातून सरकारचा पक्षपातीपणा देखील समोर आला आहे, अशा शब्दांत यावेळी आंदोलकांनी टीका केली.
हेही वाचा - 'राज्य सरकारच्या कल्पनाशक्तीची कमाल वाटतेय, रोज नवीन काहीतरी बाहेर काढताहेत'
