जळगाव - जिल्ह्यात दिवसेंदिवस कोरोना पॉझिटिव्ह रुग्णांची संख्या वाढत आहे. जिल्ह्यात शुक्रवारी ३३४ नवीन कोरोना पॉझिटिव्ह रुग्ण आढळले. त्यात सर्वाधिक ९० पॉझिटिव्ह रुग्ण हे एकट्या जळगाव शहरातील आहेत. दुसरीकडे, शुक्रवारी दिवसभरात १० रुग्णांचा उपचार सुरू असताना मृत्यू झाला आहे. दिलासादायक बाब म्हणजे, शुक्रवारी २०४ जण कोरोनामुक्त झाले आहेत.
जळगाव जिल्ह्यात कोरोनाचा कहर सुरुच आहे. त्यात जिल्ह्यात शुक्रवारी नव्याने आढळलेल्या रुग्णांमध्ये जळगाव शहर ९०, जळगाव ग्रामीण १४, भुसावळ १८, अमळनेर १९, चोपडा ७, पाचोरा ४०, भडगाव १४, धरणगाव ३२, यावल १, एरंडोल ९, जामनेर ३२, रावेर ७, पारोळा २, चाळीसगाव ४०, मुक्ताईनगर ७ आणि दुसऱ्या जिल्ह्यातील १ असे एकूण ३३४ नव्या पॉझिटिव्ह रुग्णांचा समावेश आहे.
हेही वाचा - राज्यात शुक्रवारी ९ हजार ६१५ कोरोनाबाधितांची नोंद, २७८ मृत्यू
जिल्ह्यात शुक्रवारी १० रुग्णांचा कोरोनामुळे मृत्यू...
कोरोनामुळे शुक्रवारी दिवसभरात १० कोरोना पॉझिटिव्ह रुग्णांचा उपचारादरम्यान मृत्यू झाला आहे. त्यात जळगाव शहरासह जळगाव, भुसावळ, रावेर आणि चाळीसगाव तालुक्यातील प्रत्येकी १ तर यावल तालुक्यातील २ तर पाचोरा तालुक्यातील ३ कोरोना पॉझिटिव्ह रुग्णांचा समावेश असल्याची माहिती जिल्हा प्रशासनाने दिली आहे. आतापर्यंत ४५० कोरोनाबाधित रुग्णांचा उपचारादरम्यान मृत्यू झाला आहे.
कोरोनाबाधितांचा आकडा ९ हजारांहून अधिक...
सध्या जिल्ह्यात कोरोनाबाधितांची संख्या ९ हजार १८३ झाली आहे. त्यापैकी ५ हजार ८३४ रुग्ण कोरोनामुक्त होऊन घरी गेले आहेत. सध्या २ हजार ८९९ कोरोनाबाधित रुग्णांवर उपचार सुरु आहे.
