जळगाव - जिल्ह्यातील कोरोनाचा संसर्ग वाढतच आहे. सोमवारी जिल्ह्यात पुन्हा 205 नवे कोरोनाबाधित रुग्ण आढळले. त्यामुळे जिल्ह्यातील कोरोनाबाधित रुग्णसंख्या 6 हजारांच्या पार गेली आहे. सद्यस्थितीत जिल्ह्यातील रुग्णसंख्या 6 हजार 167 इतकी झाली आहे. सोमवारी जिल्ह्यातील 6 जणांचा कोरोनामुळे मृत्यू झाला. दरम्यान, जिल्ह्यातील जळगाव शहरासह भुसावळ आणि अमळनेर तालुक्यात प्रशासनाने जाहीर केलेला लॉकडाऊन 14 जुलैपासून सशर्त हटविण्यात येणार आहे.
जळगाव जिल्हा प्रशासनाला सोमवारी रात्री प्राप्त झालेल्या अहवालांमध्ये एकूण 205 रुग्णांचे अहवाल पॉझिटिव्ह आले. पॉझिटिव्ह आलेल्या अहवालांमध्ये जळगाव शहर 56, जळगाव ग्रामीण 9, भुसावळ 16, अमळनेर 8, चोपडा 9, पाचोरा 6, भडगाव 1, धरणगाव 22, यावल 7, एरंडोल 23, जामनेर 5, रावेर 11, पारोळा 15, चाळीसगाव 4, मुक्ताईनगर 7, बोदवड 5 तसेच अन्य जिल्ह्यातील एका रुग्णाचा समावेश आहे. जळगाव जिल्ह्यातील प्रमुख हॉटस्पॉट असलेल्या जळगाव शहरात सोमवारी देखील सर्वाधिक 56 नवे पॉझिटिव्ह रुग्ण आढळले. त्यामुळे जळगावातील रुग्णसंख्या आता 1 हजार 476 इतकी झाली आहे. जळगाव पाठोपाठ भुसावळ शहरात मोठी रुग्णसंख्या आहे. भुसावळात आतापर्यंत कोरोनाचे 571 रुग्ण आहेत.
हेही वाचा - राज्यात आज साडेसहा हजार नव्या रुग्णांची भर, १९३ जणांचा मृत्यू
जिल्ह्यात सोमवारी 6 जणांचा कोरोनामुळे मृत्यू...
सोमवारी जिल्ह्यातील 6 जणांचा कोरोनामुळे मृत्यू झाला. जिल्ह्यात आतापर्यंत मृत्यू झालेल्या व्यक्तींची संख्या 335 इतकी झाली आहे. सोमवारी मृत्यू झालेल्यांमध्ये जळगाव शहरातील 60 वर्षीय वृद्ध, जळगाव तालुक्यातील 65 वर्षीय वृद्धा, रावेर तालुक्यातील 68 वर्षीय वृद्ध, चाळीसगाव तालुक्यातील 85 वर्षांचे 2 वृद्ध तसेच बोदवड तालुक्यातील 59 वर्षीय पुरुषाचा समावेश आहे.
जळगाव जिल्ह्यातील लॉकडाऊन हटणार...
जळगाव जिल्ह्यातील कोरोनाबाधितांची वाढत जाणारी संख्या लक्षात घेता जिल्हा प्रशासनाने जळगाव शहरासह भुसावळ आणि अमळनेर तालुक्यात 7 ते 13 जुलै दरम्यान, लॉकडाऊन जाहीर केला होता. हा लॉकडाऊन उद्यापासून (14 जुलै) सशर्त हटणार आहे. तीनही ठिकाणी गर्दीच्या ठिकाणी, बाजारपेठेत सर्वसामान्यांना वाहनांसह प्रवेशबंदी घालण्यात आली आहे. जिल्ह्यातील सर्व शॉपिंग कॉम्प्लेक्स, मॉल्समधील दुकाने, कार्यालये बंदच असणार आहेत. मात्र, इतर सर्व प्रकारची दुकाने पूर्ववत सुरू होतील. जिल्ह्यात सर्वत्र दुकाने सकाळी 9 ते सायंकाळी 7 या वेळेत सुरू राहतील. आधीच्या तुलनेत दुकानांना 2 तास अधिक सूट मिळाली आहे. जिल्हाधिकारी अभिजित राऊत यांनी सोमवारी रात्री याबाबत सुधारित अधिसूचना जारी केली.
हेही वाचा - अरे वा! लालबागचा राजा मंडळाने शोधले 137 प्लाझ्मा दाते, लवकरच केईएमएमध्ये करणार प्लाझ्मा दान
