हिंगोली - हिंगोलीमध्ये नव्याने सुरु होत असलेल्या विषाणू संशोधन आणि निदान प्रयोगशाळेचा ऑनलाइन उद्घाटन सोहळा आज शालेय शिक्षणमंत्री तसेच हिंगोलीच्या पालकमंत्री वर्षा गायकवाड यांच्या हस्ते पार पडला. या प्रयोगशाळेचा जिल्ह्यातील कोरोनाबाधितांना फायदा होणार आहे. या प्रयोगशाळेसाठी खा. राजीव सातव यांनी सातत्याने पाठपुरावा केला होता. त्याला अखेर यश आले आहे.
कोरोना निदानाचा कालावधी दोन ते तीन दिवसांनी कमी झाला -
देशात सध्या कोरोनाची साथ सुरू आहे. राज्यात कोरोनाचे सर्वाधिक रुग्ण आढळून येत आहेत. हिंगोली जिल्ह्यात देखील आतापर्यंत मोठ्या प्रमाणात कोरोनाबाधित सापडले आहेत. जिल्ह्यामध्ये एकही प्रयोगशाळा नसल्याने, कोरोनाचे निदान होण्यासाठी दोन ते तीन दिवसांचा कालावधी लागायचा. चाचणी करण्यासाठी रुग्णांचे नमुने नांदेड, औरंगाबादसारख्या ठिकाणी पाठवावे लागत होते. मात्र आता हिंगोलीत प्रयोगशाळा तयार करण्यात आल्याने, रुग्णाचे लवकर निदान होण्यासाठी मदत होणार आहे. या प्रयोेगशाळेत विविध चाचण्या करण्यासाठी आरोग्यविभागाच्या सूचनेनुसार विविध यंत्रसामुग्री उभारण्यात आली आहे. तसेच योग्य त्या मनुष्यबळाची नियुक्ती येणाऱ्या काळात केली जाणार आहे
एका दिवसात 200 ते 300 नमुने तपासण्याची सोय
या प्रयोग शाळेत दिवसभरात 200 ते 300 नमुन्यांची तपासणी करणे शक्य होणार आहे. कोरोनाबरोबरच इतर आजारांचे निदान देखील या प्रयोगशाळेत केले जाणार असल्याने हिंगोलीकरांना दिलासा मिळाला आहे.
खासदार राजीव सातव यांच्या पाठपुराव्याला यश
हिंगोली जिल्ह्यांमध्ये कोरोनाच्या पार्श्वभूमीवर ही अद्ययावत प्रयोगशाळा उभारण्यासाठी खा. राजीव सातव यांनी वैद्यकीय शिक्षणमंत्री अमित देशमुख यांच्याकडे पाठपुरावा केला होता. अखेर मंत्री देशमुख यांनी सातव यांची मागणी मंजूर करून तसे पत्राद्वारे कळविले होते, नंतर ही प्रयोगशाळा उभारणीसाठी सुरुवात झाली, तर प्रयोगशाळा उभारणीसाठी लागणारा खर्च हा जिल्हा नियोजनमधून उपलब्ध करून देण्यात आला आहे. केवळ प्रयोगशाळाच नाही तर जिल्ह्यामध्ये वैद्यकीय महाविद्यालय देखील उभारणार असल्याचे यावेळी पालकमंत्री वर्षा गायकवाड यांनी सांगितले.
