हिंगोली - वसमत तालुक्यातील पिंपराळा येथे मामाच्या भेटीसाठी दोन मित्रांसह निघालेला भाच्याचा ओढ्याला आलेल्या पुरात दुचाकीसह वाहून गेल्याने मृत्यू झाला. तर, इतर दोघांना पोहायला येत असल्याने ते बचावले. मारोती कचरू खबाले(२२) रा. गोटेवडी असे मृताचे नाव आहे. ही घटना रविवारी रात्री साडेनऊच्या सुमारास घडली होती. मारोतीचा दुसऱ्या दिवशी मृतदेह आढळला. रात्रभर मृतदेह पाण्यात असल्याने, मृतदेह पूर्णपणे कुजला होता. या प्रकरणी कुरुंदा पोलीस ठाण्यात अकस्मात मृत्युची नोंद केली आहे.
मारोती हा दुचाकीने (एम.एच. १४ एफ.एल ९५४१) दिवाळी निमित्त आकाश बेले अन ज्ञानेश्वर बेले या दोन मित्रांसमवेत पिंपराळा येथे असलेल्या मामाकडे निघाला होता. मात्र, पाऊस सुरू असल्याने ते तिघे शिरळी येथील आपल्या नातेवाईकांच्या घरी थांबले होते. तेथे त्यांनी जेवण आटोपले अन पिंपराळा मार्गे निघत होते. पण, पाऊस जोरात सुरू असल्याने नातेवाईकांनी त्यांना थांबण्याची विनवणी केली होती. मात्र, त्याने नातेवाईकांच्या विनंतीकडे दुर्लक्ष केले. अन् ते तिघे दुचाकी घेऊन पिंपराळा मार्गे निघाले.
हेही वाचा - डोहात बुडून दोन मेंढपाळांच्या मुलांचा मृत्यू
गावापासून काही अंतरावर जाताना वरदडी येथील ओढ्याला मोठ्या प्रमाणात पूर आला अन् यात दुचाकीसह तिघेजण वाहून गेले. आकाश अन ज्ञानेश्वरला पोहणे येच असल्यामुळे ते बाहेर निघाले, मात्र मारोती पाण्याच्या प्रवाहासह पुढे वाहत गेला. घाबरलेल्या स्थितीत मारोतीच्या दोन मित्रांनी शिरळी गाठली अन् मारोती पुराच्या पाण्यात वाहून गेल्याची माहिती नागरिकांना दिली. लागलीच नागरिकांनी घटनास्थळी धाव घेऊन मारोतीचा रात्री उशिरापर्यंत शोध घेतला. मात्र, मारोती सापडला नाही. दुसऱ्या दिवशी पहाटे पहाटे पुन्हा शोधमोहीम सुरू केली असता मारोतीचा मृतदेह कुजलेल्या अवस्थेत आढळला. तर काही अंतरावर दुचाकी आढळून आली.
पिंपराळा येथील मामाची राहिली अधुरी भेट
पिंपराळा येथील मामाच्या भेटीसाठी मोठ्या आतुरतेने निघालेल्या मारोतीचा नदीला आलेल्या पुरात वाहून गेल्याने मृत्यू झाला. त्यामुळे पिंपराळा येथील मामाची अन् मारोतीची भेट अर्धवट राहिली. मारोतीच्या मृत्यूमुळे मामाच्या गावात व गोटेवाडीत शोककळा पसरली आहे. कुरुंदा पोलीस ठाण्याचे सपोनि एरेकर, पोलीस कर्मचारी भोपे व वाकळे यांनी घटनास्थळी धाव घेऊन घटनेचा पंचनामा केला व मृतदेह शेवविच्छेदनासाठी वसमत येथील उपजिल्हा रुग्णालयात पाठविले.
हेही वाचा - हिंगोली : परतीच्या पावसाचा हाहाकार, कयाधु नदीचा बंधारा फुटला
हिंगोली जिल्ह्यात मागील ४ ते ५ दिवसांपासून पावसाची संततधार असल्याने नदी-नाले दुथडी भरून वाहत आहेत. तर, रविवारी झालेल्या मुसळधार पावसामुळे नदी नाल्याची पाणी पातळी मोठ्या प्रमाणात वाढली आहे.
हेही वाचा - औंढा नागनाथ येथे तीन दिवसीय दिवाळी महोत्सव; अलंकार पूजा पाहून व्हाल थक्क..
