हिंगोली- तालुक्यातील जामठी खुर्द परिसरात हरणाची शिकार करून त्याच्या मासाचे तुकडे केले जात होते. ही बाब वनविभागाच्या लक्षात येताच विभागातील चपळ वनरक्षकाने घटनास्थळी धाव घेतली. मात्र, तोपर्यंत शिकऱ्याने अर्धवट मास घेऊन पोबारा केला होता. त्यानंतर सर्व प्रक्रिया पार पडल्यानंतर वनविभागाने गुन्हा दाखल केला. मात्र ही घटना घडून आता सहा दिवस उलटले. तरीही वनविभागाला आरोपी गवसले नसल्याचे चित्र आहे.
हिंगोली जिल्ह्यात दिवसेंदिवस वन्यप्राण्यांच्या शिकारीत मोठ्या प्रमाणात वाढ झाली आहे. दोन महिन्यापूर्वी देखील औंढा नागनाथ तालुक्यात अशीच एका वन्यप्राण्याची शिकार करण्यात आली होती. त्याचे फोटो व्हायरल झाल्यानंतर काही वेळातच वनविभागने आरोपींना शोधून त्यांच्यावर गुन्हे दाखल करण्याची तत्परता दाखवली होती. मात्र या प्रकरणात गुन्हा दाखल करण्यासाठी तर विलंब लावलाच. मात्र सहा दिवस उलटले तरी अद्याप वनविभागाला फरार आरोपींचा सुगावा लागला नाही.
इतकेच नव्हे तर नेहमीच वन्य प्राण्यांमध्ये वावरणाऱ्या वन विभागाच्या अधिकाऱ्यांना घटना स्थळावरील शव नेमके कोणत्या प्राण्याचे आहे हे देखील कळू शकले नाही. प्रयोग शाळेकडून अहवाल आल्यानंतर कारवाईच्या हालचाली सुरू झाल्या. यात ग्रामीण पोलीस ठाण्यात गुन्हा दाखल झाला. मात्र आता फरार आरोपी नेमका कधी सापडणार, आणि असेच सुरू राहिले तर खरोखरच शिकाऱ्यावर वनविभागाचा वचक राहील का? असा प्रश्न वन्यप्रेमींकडून उपस्थित केल्या जात आहे. त्याचबरोबर या प्रकरणी वनविभागाच्या कर्तव्याबद्दल देखील शंका व्यक्त केली जाते.
हेही वाचा- हिंगोलीत दुसऱ्यांदा जुगारावर स्थानिक गुन्हे शाखेचा छापा; साडे सात लाखांचा मुद्देमाल जप्त
दुसरीकडे बुलडाणा जिल्ह्यात १०० च्या वर कुत्रे मारल्या प्रकरणी पाच आरोपी ताब्यात घेण्यात आले. मात्र जिल्हा वन विभागाला हरणाची शिकार करणाऱ्याला देखील पकडता आले नाही. वनविभागाचा असाच आलबेल कारभार सुरू राहिला तर शिकाऱ्यांमध्ये भीती निर्माण होण्याऐवजी त्यांचे मनोबल वाढण्याची शक्यता निर्माण झाली आहे.
