हिंगोली - एक अट्टल दुचाकी चोर आखाडा बाळापूर पोलिसांच्या हातावर तुरी देऊन रविवारी रात्री पळून गेला होता. यानंतर पोलिसांनी जिल्ह्यात सर्वत्र नाकाबंदी केली होती. रात्रभराच्या तपासणीनंतर हा चोरटा सकाळी अकराच्या सुमारास पोलिसांच्या हाती आला आहे.
जिल्ह्यात दुचाकी चोरीच्या घटना मोठ्या प्रमाणात वाढल्या आहेत. वाढत असलेल्या घटना पाहून स्थानिक गुन्हे शाखेच्या पथकाने दुचाकी चोरास ताब्यात घेण्यासाठी पथके स्थापन केली होती. पथके जिल्ह्यात जागोजागी चोरट्यावर लक्ष ठेऊन होते. गोपनीय माहितीच्या आधारे मिळालेल्या माहिती नुसार वसमत येथे दुचाकी विक्रीसाठी आलेल्या देगलूर येथील देविदास बाबुराव कांबळे याला पोलिसांनी शुक्रवारी ताब्यात घेतले अन त्याने नांदेड शहरातील अनेक दुचाकी चोरून हिंगोली जिल्ह्यात विक्री केल्याचे पोलिसांना सांगितले. त्यावरून पोलिसांनी तब्बल 26 दुचाकी जप्त केल्या होत्या. याप्रकरणी दुचाकी चोरावर आखाडा बाळापूर येथे गुन्हा दाखल केला आणि चोरट्याला आखाडा बाळापूर पोलिसांच्या हवाली केले होते.
आखाडा बाळापूर पोलिसांनी रविवारी चोरट्याला सेनगावच्या न्यायालयात हजर केले होते. त्याला रात्री परत आखाडा बाळापूर येथे नेत असताना कळमनुरी जवळ माळेगाव फाटा येथे वाहतूक ठप्प झाली होती. पोलीस वाहन थांबल्याने तसेच वाहनात केवळ दोनच कर्मचारी असल्याची संधी पाहून चोरट्याने पोलीस वाहनातून उडी मारून पलायन केले होते.
पोलिस वाहनात असलेल्या दोन कर्मचाऱ्यांनी त्याचा बराच लांब पाठलाग केला. मात्र तो पोलिसांच्या हाती लागला नाही. सोयाबीनचे पीक जास्त वाढल्याने अंधार पडल्यामुळे पोलिसांना तो रात्रीच्या सुमारास सापडला नाही पोलिसांनी रात्री बराच वेळ शोध घेतला, नाकाबंदी देखील केली. चोर ज्या दिशेने पळून गेला, त्या दिशेने पथकाने तपासणी केली तर तो एका झाडाखाली झोपलेल्या अवस्थेमध्ये आढळून आला. जरी हा चोरटा सापडला असला तरी पोलिसांच्या हलगर्जीपणाबद्दल नाराजी व्यक्त केली जात आहे.
