नांदेड - केंद्राच्या निधीअभावी हिंगोली लोकसभा मतदारसंघात घरकुल योजना रखडली होती. त्याची तात्काळ दखल घेऊन खासदार हेमंत पाटील यांनी पंतप्रधान आवास योजनेतील रखडलेला निधी तात्काळ मंजूर व्हावा, यासाठी केंद्रीय गृहनिर्माण मंत्री हरदिप सिंग पुरी यांची भेट घेऊन मतदार संघासाठी ५० कोटी रुपयांचा निधी मंजूर करून दिला. हिमायतनगरसाठी सर्वाधिक ६ कोटी ६१ लक्ष रुपयाचा सर्वाधिक निधी मंजूर झाला असून एकूण १० हजाराच्यावर घरकुल लाभार्थ्यांना याचा लाभ मिळणार आहे.
निम्मे हप्ते न मिळाल्याने घर राहिली होती अर्धवट
सर्वसामान्य कुटुंबातील व्यक्तीचे स्वप्न असते की आपले स्वतःचे एक घर असावे. या स्वप्नपूर्तीसाठी 'सर्वांसाठी घरे' या संकल्पनेतून देशात पंतप्रधान आवास योजना राबविण्यात आली. मात्र एक वर्षापेक्षा जास्त कालावधी लोटूनही अनेक लाभार्थ्यांना अद्याप त्यांचे निम्मे हप्ते न मिळाल्याने त्यांची घरे अर्धवट राहिली होती. हिंगोली लोकसभा मतदार संघातील नगर परिषद आणि नगर पंचायती अंतर्गत घरकुल योजनेचा निधी कोरोनाच्या काळात कित्येक दिवसापासून रखडला होता. यामुळे सर्व सामान्य नागरिकांना अडचणींना सामोरे जावे लागत होते, निधीअभावी घरकुलाची कामे खोळंबली होती.
१० हजार ५७४ घरकुलांसाठी एकूण ५० कोटी......!
खासदार हेमंत पाटील यांनी घरकुल योजनेबाबत केंद्र स्तरावर सातत्याने पाठपुरावा केल्यामुळे मतदार संघातील सर्वच नगरपरिषद आणि नगर पंचायती अंतर्गत येणाऱ्या एकूण १० हजार ५७४ घरकुलांसाठी एकूण ५० कोटी रुपयाचा निधी मंजूर झाला आहे. यामध्ये हिमायतनगर ६ कोटी ६१ लक्ष , हिंगोली ६ कोटी ४३ लक्ष, वसमत ४ कोटी १८ लक्ष, कळमनुरी २ कोटी ४२ लक्ष, उमरखेड ३ कोटी ८८ लक्ष, हदगाव ५ कोटी २१ लक्ष, किनवट ४ कोटी १० लक्ष तर माहूर ५ कोटी ०२ लक्ष, औंढा नागनाथ ४ कोटी ७२ लक्ष, महागाव ३ कोटी ७१ लक्ष आणि सेनगाव साठी २ कोटी ९८ लक्ष असा रखडलेला निधी मिळून अंदाजे ५० कोटी मंजूर झाले आहेत.
दुर्देवाने काही नेते याचेही श्रेय घेत आहेत - खासदार हेमंत पाटील
घरकुलाच्या मागणीचा पाठपुरावा सातत्याने सुरु आहे. हा विषय केंद्र सरकारच्या अखत्यारीत येत असल्यामुळे तो राज्याच्या नेत्यांनी मंजूर करून आणण्याचा प्रश्नच उद्भभवत नाही. दुर्देवाने काही नेते याचे श्रेय घेत आहेत. घर असावे हे सर्व सामान्य जनतेचे स्वप्न असते आणि ते त्यांना मिळायलाच पाहिजे यामध्ये कोणीही राजकारण करू नये, असेही खासदार हेमंत पाटील म्हणाले.
हेही वाचा - वर्षाच्या अखेरीस प्रधानमंत्री मोदी अमेरिकेचा दौरा करण्याची शक्यता
