हिंगोली - 'कसली कर्जमाफी अन कसलं काय, बँकेत कर्जमाफीचा शब्द जरी काढला तर बँकवाले म्हणतात, जा मग तिकडं सरकारला जाऊन विचारा कर्जमाफीचं काय झालं, आमचे डोके खाऊ नका,' असा आरोप जिल्हाधिकारी कार्यालयावर काढण्यात आलेल्या शेतकरी संघटनेच्या धरणे आंदोलनात सहभागी शेतकऱ्यांनी केला आहे. दरम्यान, हे सरकार कर्जमाफी केली म्हणून शेतकऱ्यांना केवळ भूलथापा देत आहे. कर्जमाफी तर झालीच नाही वरुन बँक अधिकारी दुसरे कर्जही देण्यासाठी नकार देत असल्याची माहिती शेतकऱ्यांनी यावेळी दिली.
हे सरकार कर्जमाफी झाली असं घोकून-घोकून सांगत आहे. कर्जमाफी झालेल्या शेतकऱ्यांच्या नावांच्या याद्या ही संबंधित गावांमध्ये वाटप करण्यात आल्या आहेत. मात्र, मुळात कर्जमाफी झालेली नसल्याने अनेक शेतकऱ्यांना बँकेत उभे देखील राहू दिले जात नाही. कर्जमाफीचा विषय जरी काढला तरी बँक अधिकारी शेतकऱ्यांना धुडकावून लावतात, वरुन आम्ही तुम्हाला पाहून कर्जमाफी दिली, सरकारला पाहून नाही, असा जाब विचारतात, असा संतप्त खुलासा शेतकऱ्यांनी आंदोलनादरम्यान केला.
शेतकऱ्यांना शेतमाल विकण्यासाठी खुल्या बाजारापेठा उपलब्ध नाहीत. यामुळे शेकऱ्यांसमोर मोठ्या अडचणी उभ्या राहत आहेत. यामुळे शेतकऱ्यांना खुल्या बाजारापेठांमध्ये शेतमाल विकण्याची सोय व्हावी. यासोबतच वीजबिल मुक्ती, सार्वत्रिक शिवार मोजणी करुन ग्रामीण पांदणरस्ते - पाऊलवाटा, नवबंधारे आणि गावाच्या सीमारेषा पुनर्स्थापना करण्याची मागणी यावेळी शेतकरी संघटनेच्या वतीने करण्यात आली आहे.
दरम्यान, या धरणे आंदोलनामध्ये जिल्हाभरातील शेतकरी मोठ्या प्रमाणात सहभागी झाले आहेत. आगामी विधानसभेच्या तोंडावर शेतकरी संघटना आक्रमक झाल्याने, या शेतकऱ्यांना खरोखरच कितपत न्याय मिळेल याकडे सर्वांचे लक्ष लागलेले आहे.
