हिंगोली- कळमनुरी अगारात कळमनुरी- सोलापूर बसमध्ये एका कापडाच्या पिशवीत स्त्री जातीचे मृत अर्भक आढळून आले आहे. हे अर्भक कापडाच्या पिशवीत गुंडाळून ठेवण्यात आले होते. आज सायंकाळी साडेपाचच्या सुमारास हे अर्भक आढळून आले. त्यामुळे परिसरात एकच खळबळ उडाली.
नाड्याने गळा आवळून या अर्भकांची हत्या केल्याचे शव विच्छेदन अहवालात समोर आले आहे. त्याचबरोबर अर्भकाच्या गळ्याभोवती नाडा अडकलेल्या अवस्थेत आढळून आला आहे. या प्रकरणी कळमनुरी पोलीस ठाण्यात अज्ञात व्यक्तीविरूद्ध गुन्हा दाखल करण्यात आला आहे.
सोलापूर- कळमनुरी (एम.एच.२० बी.एल. ०८३८) या क्रमांकाची बस सोलापूरहून कळमनुरी कडे जात होती. ही बस कळमनुरी बसस्थानकात ५.३० वाजता पोहोचली. बसमधून सर्व प्रवासी उतरल्यानंतर कुणाचे समान राहिले का, हे पाहण्यासाठी डोंगरे बसमध्ये पाहणी करत होते. त्या दरम्यान बसमधील सीटच्या वर सामान ठेवण्याच्या जागी त्यांना एक तोंड बांधलेली कापडी पिशवी दिसून आली. डोंगरे यांनी पिशवी उघडून पाहिले असता त्यात एक मासाचा गोळा आढळून आला. ते एक अर्भक होते.
त्यानी ही बाब चालक माहोरे यांना सांगितली. चालकाला देखील ते अर्भक मृतावस्थेत असल्याचे दिसून आले. त्यांनी सदरील बाब अगरामध्ये सांगितली. ही माहिती मिळताच कळमनुरी पोलिसांनी घटनास्थळ गाठले. पोलीस ठाण्याचे पो.नि रणजित भोईटे यांनी घटनेचा पंचनामा केला.
अर्भक ग्रामीण रुग्णालयात शव विच्छेदनासाठी पाठविले असता, सदरील अर्भकाचा नाड्याने गळा दाबून खून केल्याचे अहवालात समोर आले. यावळी या अर्भकला पाहण्यासाठी लोकांची एकच गर्दी जमली होती. या घटनेने परिसरात एकच खळबळ उडाली आहे. या प्रकरणी कळमनुरी पोलीस ठाण्यात अज्ञात मातेविरुद्ध गुन्हा दाखल करण्यात आला आहे.
