हिंगोली - पैशाच्या वादातून राग अनावर झालेल्या ठेकेदाराने दोन मजुरांवर गोळीबार केल्याची घटना कनेरगाव नाका येथे घडली. यामध्ये मजूर गंभीर जखमी झाले आहेत. अनेक दिवसांपासून राज्य महामार्गाचे काम सुरू आहे. या रस्त्यावर परराज्यातील मजूर व ठेकेदार काम करतात. ठेकेदाराचा आणि पैशांची उचल घेतलेल्या मजुरांचा पैशावरून वाद झाला.
संजय कुमार आणि हरीराम निषाद (रा.प्यारेपुर, उत्तर प्रदेश) अशी जखमी मजुरांची नावे आहेत. हे दोघे अनेक दिवसांपासून रस्त्याचे काम करण्यासाठी आलेले आहेत. या दोघांनी ठेकेदाराकडून पैशाची उचल घेतली होती. काही तरी खासगी कामाचे कारण सांगून हे दोन मजूर गावी जाण्यासाठी सुट्टी मागत होते. मात्र, ठेकेदार त्यांना सुट्टी देत नव्हता. त्यामुळे जोरदार वाद झाला.
हेही वाचा - बडनेरा मतदारसंघात भारत गणेशपुरे विरुद्ध बिग बॉस शिव ठाकरे!
या दरम्यान ठेकेदाराला राग अनावर झाल्याने त्याने थेट दोन्ही मजुरांवर गोळ्या झाडल्या. यामध्ये एकाच्या डोक्याला तर दुसऱ्याच्या पायाला गोळी लागली. जखमी मजुरांना उपचारासाठी हिंगोली येथे हलवण्यात आले आहे.
या घटनेची माहिती मिळताच गोरेगाव पोलीस ठाण्याचे पोलीस निरीक्षक विश्वनाथ झुंजारे यांच्यासह पोलिसांनी घटनास्थळी धाव घेतली. आरोपी संतोष सिंग आसाराम सिंग, रवी कुमार गौतम या दोघांना ताब्यात घेतले.
