हिंगोली - जिल्ह्यातील सेनगाव तालुक्यातील हत्ता येथे प्रवासी ऑटोचा अपघात होऊन चालकाचा जागीच मृत्यू झाला. ही घटना शुक्रवारी पहाटेच्या सुमारास उघडकीस आली. एकनाथ मुंडे (वय ५०) असे मृत चालकाचे नाव आहे.
मुंडे हे येलदरी येथून प्रवाशी सोडून गावाकडे परतत होते. दरम्यान, सेनगाव ते हत्ता रोडवर ऑटो उलटली. या अपघातात त्यांच्या डोक्याला गंभीर दुखापत झाली आणि मोठ्या प्रमाणात रक्तस्त्राव झाल्याने त्यांचा जागीच मृत्यू झाला. तर, ऑटोचेही मोठ्या प्रमाणात नुकसान झाले आहे. ऑटो जोरात जमिनीवर कोसळल्यामुळे मुंडे यांना त्यावेळी काहीच करता आले नाही.
हेही वाचा - चोरट्यांनी चौथ्यांदा फोडली एकाच मंदिरातली दानपेटी
हिंगोली जिल्ह्यात सध्या मोठ्या प्रमाणात रस्त्याचे काम सुरू आहे. जिल्ह्याच्या चारही बाजूने रात्री बेरात्री सुरू असलेल्या या कामांमुळे अपघाताच्या घटना रोजच घडत आहेत. विशेष म्हणजे, या कामामुळे धुळीचे साम्राज्य मोठ्या प्रमाणात वाढले असल्यामुळे वाहन चालकांना समोरील वाहन दिसेनासे होते. तर रस्त्यावर जागोजागी खोदलेल्या खड्ड्यांमुळेही वाहनावरील नियंत्रण सुटून अपघात होत आहेत. याप्रकरणी अद्याप कोणताही गुन्हा नोंदवण्यात आला नसल्याची माहिती आहे.
हेही वाचा - कर्जबाजारीपणाला कंटाळून हिंगोलीत शेतकऱ्याची आत्महत्या, महिन्यातील पाचवी घटना
