गोंदियात प्रियकराच्या मदतीने पतीची हत्या, स्थानिक गुन्हे शाखेने आरोपींना केली अटक

मागील काही दिवसांपासून मृत मुलचंदच्या पत्नीसोबत आरोपीचे अनैतिक संबंध होते. मुलचंद शहारे दारू पिऊन तिला मारहाण करायचा. त्यामुळे त्याच्या पत्नीसोबत मिळून मुलचंदची हत्या करण्याचा कट १ महिन्यापुर्वी रचल्याचे आरोपी सुरेशने सांगितले.

गोंदिया - ग्रामीण पोलीस ठाण्यांतर्गत येणाऱ्या बरबसपुरा ते आंभोराकडे जाणा-या मार्गावरील कालव्याच्या पुलाखाली 7 मे रोजी एका अज्ञात व्यक्तीचा मृतदेह आढळला. पोलिसांनी घटनास्थळाकडे धाव घेतली. आता या मृताची ओळख पटविण्यात स्थानिक गुन्हे शाखेला यश आले आहे. मृताच्या पत्नीनेच प्रियकराच्या मदतीने ही हत्या केली असल्याचे समोर आले आहे.

मुलचंद गोमाजी शहारे रा. कारंजा असे हत्या झालेल्या व्यक्तीचे नाव असल्याचे स्पष्ट झाले. परंतु, तो मागील ४ महिन्यांपासून टेमनी येथे सासऱ्याकडे राहात होता. ६ मे रोजी सायंकाळी ७ वाजता कटंगी येथे जातो म्हणून तो घरातून निघाला असे त्याच्या सासरच्या लोकांनी पोलिसांना सांगितले होते. परंतु, पोलिसांनी या संदर्भात तपास केल्यानंतर धक्कादायक माहिती समोर आली. मृताच्या पत्नीचे टेमणी येथील शेजारी राहणा-या सुरेश सिताराम नागरिकर याच्यासोबत अनैतिक संबंध होते. त्यामुळेच मुलचंदची हत्या झाल्याचा संशय पोलिसांना आला.

पोलिसांनी तपासाची चक्रे फिरविली असता सुरेश नागरिकने साथीदार धर्मेंद्र सुधाकर मारबदे याच्या मदतीने हा खून केल्याची बाब समोर आली. या दोघांना टेमणी येथून पोलिसांनी अटक केली. मागील काही दिवसांपासून मृताच्या पत्नीसोबत आरोपीचे अनैतिक संबंध होते. मुलचंद शहारे दारू पिऊन तिला मारहाण करायचा. त्यामुळे मुलचंदची हत्या करण्याचा कट १ महिन्यापुर्वी त्याच्या पत्नीसोबत मिळून रचल्याचे आरोपी सुरेशने सांगितले.

सुरेशने आपला साथीदार धर्मेंद्र मारबते याच्यासह मृत मुलचंद शहारे याला ५ मेच्या सायंकाळी ७:३० वाजता घटनास्थळी दारू पिण्यासाठी बोलावले. यानंतर कु-हाडीने त्याच्या डोक्यावर वार करून हत्या केली. महेंद्र ग्यानिराम शहारे याच्या तक्रारीवरून गोंदिया ग्रामीण पोलीसांनी आरोपीविरूध्द भादंविच्या कलम ३०२, ३४ अन्वये गुन्हा दाखल केला आहे. आरोपींना न्यायालयाने १५ मेपर्यंत पोलीस कोठडी सुनावली आहे.