गोंदिया - गोंदिया जिल्ह्यात कोरोनाचा प्रधुभाव मोठ्या प्रमाणात वाढत असून जिल्ह्यात अनेक रुग्णालयात रुग्णांना बेड उपलब्ध नाहीत. अश्यातच एक रुग्णालयात बेड उपलब्ध नसल्याने डॉक्टरांनी रुग्णाला भरती करून घेतले नाही. म्हणून रुग्णांच्या नातेवाईकांनी रूग्णालयात तोडफोड करून डॉक्टरांना शिविगाळ व मारण्याची धमकी दिली.
तोडफोड करून ५० हजार रूपयांचे नुकसान-
गोंदिया जिल्ह्यातील तिरोडा तालुक्याअंतर्गत असलेल्या खैरलांजी मार्गावर दया हॉस्पिटलमध्ये १३ एप्रिलच्या रात्री १०:३० वाजेदरम्यान ही घटना घडली आहे. महेंद्र परिहार (रा. बोदा, अत्री,) संजय प्रतीचंद येडे, अनिल प्रतीचंड येड व जितेंद्र प्रीतीचंद येडे हे तिन्ही (रा. पार्डी, नागपूर) रूग्णाला बेशुध्दअवस्थेत घेउन आले. यावेळी डॉ. संदीप विठ्ठलराव मेश्राम यांनी रूग्णाला तपासून रूग्ण गंभीर आहे. व आपल्याकडे बेड उपलब्ध नसल्यामुळे गोंदियाला घेउन जा, असा सल्ला दिला. यावर रुग्णाच्या नातेवाईकांनी रूग्णाला भरती का करीत नाही म्हणुन तक्रारदाराला थापड मारली तसेच हॉस्पिटलमधिल कॅबिनचे काच फोडले. ऑक्सिजन सिलींडरला लाथ मारून खाली पाडले व रूग्णाच्या बेडला लाथ मारून दवाखान्यातील काचेच्या दाराची तोडफोड करून ५० हजार रूपयांचे नुकसान केले.
चारही जणांना अटक-
तसेच डॉ. मेश्राम यांना शिवीगाळ करून मारण्याची धमकी दिली आहे. या प्रकरणी डॉ. मेश्राम यांच्या तक्रारीवरून तिरोडा पोलीसांनी भादंविच्या कलम ४५२, ४२७, ३२३, ५०४, ५०६, ३४ सहकलम ४ महाराष्ट्र वैद्यकीय सेवा व्यक्ती आणि वैद्यकीय संस्था (हिंसक कृत्य व मालमत्ता हानी व नुकसान प्रतिबंध अधिनियम - २०१०) अन्वये गुन्हा नोंद केला आहे. तसेच गुन्ह्यातील चारही जणांना अटक करण्यात आली आहे.
हेही वाचा- विमानात झाली पुत्रप्राप्ती, आईवडील जन्म प्रमाणपत्रासाठी झिजवताहेत चपला
