गोंदिया - एक कंत्राटदार देयक काढून देण्यासाठी ३ लाखांची लाच मागणाऱ्या काँग्रेसच्या जिल्हा परिषद शिक्षण सभापती रमेश अंबुले याला लाचलुचपत प्रतिबंधक विभागाच्या अधिकाऱ्यांनी आज (शुक्रवार) रंगेहाथ पकडले. ह्या अगोदरही भाजपचे समाजकल्याण सभापती विश्वजित डोंगरे यालासुद्धा लाच घेताना अटक करण्यात आली होती.
गोंदिया जिल्हा परिषदेत काँग्रेस आणि भाजप युतीची सत्ता आहे. तक्रारदाराने विद्युतीकरणाच्या मंजुरीसाठी जिल्हा परिषदेकडे पाठविलेली काही कामे मंजूर न झाल्याने ते जि.प. सभापती रमेश अंबुले यांना त्यांच्या कार्यालयात जाऊन भेटले. यावेळी अंबुले याने थांबवून ठेवलेली देयके काढण्यास सांगतो मात्र, मागच्यावेळी बोलल्याप्रमाणे तुम्ही मला पैसे दिलेले नाहीत, असे सांगून तक्रारदाराला ४ लाखांची मागणी केली. याप्रकरणी तक्रारदाराने २१ जानेवारीला लाचलुचपत प्रतिबंधक विभागाकडे तक्रार नोंदविली.
तक्रारदाराची थांबवून ठेवलेली कामाची देयके, मागील प्राप्त झालेल्या देयकांची व उर्वरित विद्युतीकरणाच्या कामाची देयके काढून देण्याकरिता लाचखोर अंबुले याने २० टक्क्यांप्रमाणे ४ लाख रुपये लाचेची मागणी केली. तर, तडजोडीअंती १५ टक्क्याप्रमाणे ३ लाख रुपये देण्याचे ठरले. दरम्यान ३ लाख रुपये लाच घेताना आज अंबुले यांना लाचलुचपत विभागाने रंगेहाथ पकडले.
हेही वाचा - गोदिंया जिल्ह्यात २०१९ मध्ये अपघाताचे प्रमाण १० टक्क्यांनी घटले
गोंदिया जिल्हा परिषदेतील सभापतींना लाच घेताना अटक होण्याची ही दुसरी घटना आहे. यामुळे जिल्ह्यातील नागरिक आता जिल्हा परिषदेतील पदाधिकाऱ्यांच्या कार्यशैलीवर प्रश्नचिन्ह उपस्थित करू लागले आहेत.
हेही वाचा - धक्कादायक..! शासकीय राजमुद्रेचे बनावटी नियुक्तीपत्र देऊन ७८ बेरोजगारांना लाखों रुपयाने फसविले
