गोंदिया - चार्जिंगसाठी ठेवलेले मोबाइल चोरी करणार्‍या टोळीतील तीन महिलांना गोंदिया शहर पोलिसांनी अटक केली आहे. गोंदियाच्या रहिवासी मोहसीन सेफी शेख (32 वर्ष रा. मामा चौक) यांच्या राहत्या घरातून चोरट्याने 10 हजार व 7 हजार रुपये किंमतीचे मोबाइल चोरी केले होते.
या प्रकरणातील आरोपींचा शोध सुरू होता. गोपनीय माहितीच्या आधारावर पोलिसांनी रेल्वे स्थानकाजवळील खुल्या जागेवर संशयास्पद स्थितीत बसलेल्या महिलांची चौकशी केली. त्या महिलांकडून दोन मोबाइल जप्त करण्यात आले. अटक करण्यात आलेल्या तिन्ही महिला छत्तीसगडच्या डोंगरगड येथील रहिवासी आहेत. या महीलांवर मोबाइल चोरीचे चार गुन्हे गोंदिया शहर पोलीस ठाण्यात दाखल आहेत.
पोलीस निरीक्षक महेश बंसोडे यांच्यासह सहायक पोलीस निरीक्षक विजय राणे व पोलीस कर्मचार्‍यांनी रेल्वे स्थानक परिसरात आरोपींनी खड्डे खोदून लपविलेले 25 मोबाइल जप्त केले. जप्त केलेल्या मोबाइलची किंमत 2.32 लाख रुपये असल्याचे सांगण्यात आले आहे. महिलांना अटक केल्यावर न्यायालयाने त्यांना एक दिवसाची पोलीस कोठडी सुनावली आहे.
2 वर्षांपूर्वी चोरी झालेले 8 लाखांचे दागिने महिलेला परत केले-
रामनगर पोलीस ठाण्यांतर्गत येणार्‍या रेलटोली येथील रहिवासी भाविनी निखिल रूपारेल (40 वर्ष) यांच्या घरून 22 ऑगस्ट 2018 रोजी चोरी झालेले 7 लाख रुपये किंमतीचे दागिने (आजच्या बाजार भावानुसार 8 लाख रुपये) पोलीस अधीक्षक विश्व पानसरे यांच्या हस्ते परत देण्यात आले. हे दागिने चोरी गेल्यानंतर पोलिसांनी 23 ऑगस्ट रोजी भादंवि कलम 454, 457, 380 अन्वये गुन्हा नोंद केला होता. या प्रकरणात आरोपी बबन सुरेश बागडकर (21 वर्ष रा. मरारटोली) याला अटक करण्यात आली. त्याच्या जवळून 278.60 ग्राम वजनाचे दागिने जप्त केले.
हेही वाचा- BUDGET 2021: कोरोना लसीकरणासाठी ३५ हजार कोटींची तरतूद
