गडचिरोली - देशात १५ ते २० वर्षांमध्ये गिधाडांची संख्या झपाट्याने कमी झाली आहे. मात्र, गडचिरोली जिल्ह्यात अनेकदा गिधाडे आढळून येतात. या गिधाडांचे संवर्धन व्हावे, यासाठी गडचिरोली वनविभागाने ‘गिधाड उपहारगृह’ उभारले आहे. या उपहारगृहात गिधाडांना अन्न पुरवले जात असून या उपक्रमाच्या जनजागृतीसाठी चामोर्शी व धानोरा या 2 मार्गांवर 16 संदेशात्मक मोठे फलक वनविभागाने उभारले आहेत. या मार्गाने जाताना हे संदेशात्मक फलक प्रत्येक नागरिकाचे लक्ष वेधून घेत आहेत.
गेल्या 15 ते 20 वर्षांमध्ये गिधाडांची संख्या 99 टक्क्यांनी घटल्याची माहिती वनविभागाने दिली आहे. या गिधाडांचे संवर्धन व्हावे, त्यांना अन्न उपलब्ध व्हावे या हेतूने गडचिरोली वनविभागाने नवेगाव व मारकबोडी येथे गिधाड उपहारगृह उभारले आहे. या उपहारगृहात मृत जनावरे ठेवली जातात. मात्र, मृत जनावरांवर मोकाट कुत्रे डल्ला मारत असल्याने त्यांच्या बंदोबस्तासाठी त्या उपहारगृहाला तारेचे कुंपन करण्यात आले आहे. गावातील ढोरफीडीच्या जागेवर हे उपहारगृह उभारण्यात आले असून तारेच्या कुंपनासाठी गावातील संयुक्त वन व्यवस्थापन समितीने पुढाकार घेतला आहे. अशा प्रकारचे आणखी ३ उपहारगृह मालेरमाल, मुडझा आणि माडेतुकूममध्ये प्रस्तावित करण्यात आली आहेत. लवकरच ही ३ उपहारगृहे सुरू होणार आहेत.
हेही वाचा - सिरोंचा पोलीस जवानांनी तमदाला गावातील ग्रामस्थांसोबत साजरी केली दिवाळी
चामोर्शी तालुक्यातील कुनघाडा गावामध्ये गिधाड संवर्धन कार्यालय असून या कार्यालयातून नोडल अधिकारी उपहारगृहाचे काम पाहतात. या उपहारगृहात मृत जनावरे आणणाऱ्या शेतकऱ्यास 500 रुपये दिले जात असल्याने अनेक जण मृत जनावरे कसायाला न देता उपहारगृहात आणतात. या उपहारगृहाची माहिती सर्वांपर्यंत पोहचण्यासाठी वनविभागाने 21 गिधाडमित्रही नियुक्त केले आहेत. त्यांना गणवेश, किट, गिधाडाची नोंद घेण्याचे साहित्य पुरवण्यात आले आहे.
हेही वाचा - गडचिरोलीत 'बुलेट वर बॅलेट'चा विजय; पहिल्यांदाच नक्षलवाद्यांच्या घातपाताविना पार पडली निवडणूक
त्यामुळे उपहारगृहाच्या परिसरात 200 ते 250 गिधाडांचा अधिवास असल्याची माहिती वनविभागाने दिली आहे. गिधाडांचे अस्तित्व कायम रहावे, नव्या पिढीच्या मुलांना गिधाड चित्रात नाही तर प्रत्यक्ष बघता यावे, यासाठी वनविभागाचा हा उपक्रम आहे. या उपक्रमाच्या व्यापक जनजागृतीसाठी चामोर्शी व धानोरा या 2 मार्गांवर 16 मोठे संदेशात्मक फलक लावण्यात आले आहेत. त्यामुळे हे फलक दिवसा आणि रात्रीच्या सुमारासही नागरिकांचे लक्ष वेधून घेतात. या उपक्रमामुळे जनजागृती होऊन गिधाड संवर्धनाला चालना मिळेल, अशी माहिती गडचिरोलीचे सहायक उपवनसंरक्षक सोनल भडके यांनी ‘ईटीव्ही भारत’शी बोलताना दिली.
