गडचिरोली - जिल्ह्यात दोन टप्प्यात पार पडलेल्या ग्रामपंचायत निवडणुकीचा निकाल आज हाती येत आहे. आतापर्यंत अनेक ग्रामपंचायतींचे निकाल हाती आले असले तरी अंतिम निकाल सायंकाळी चार वाजेपर्यंत हाती येण्याची शक्यता आहे. एकूणच काही ग्रामपंचायतीमध्ये महाविकास आघाडीने तर काही ग्रामपंचायतीत भाजप समर्पित पॅनलची सत्ता आली आहे.
जिल्ह्यातील सर्वात मोठा तालुका असलेल्या चामोर्शी तालुक्यातील सर्वात मोठी ग्रामपंचायत असलेल्या कुणघाडा येथे जिल्हा परिषद कृषी सभापती रमेश बारसागडे यांच्या पॅनलचा धुव्वा उडवत महाविकास आघाडी समर्पित स्वग्रामविकास पॅनेलने सत्ता मिळवली. तर तालुक्याचे लक्ष लागून असलेल्या तळोधी ग्रामपंचायतीमध्ये भाजप समर्पित बोदलवार पॅनलने सत्ता मिळवली. जिल्ह्यातील सर्वात मोठी ग्रामपंचायत असलेल्या आष्टी ग्रामपंचायतीचा निकाल अद्याप हाती यायचा आहे.
