गडचिरोली : बांधकाम ठेकेदाराकडून पैसे वसूल करून न दिल्याने नक्षलवाद्यांनी आपल्याच सहकाऱ्याची हत्या केली. ही घटना बुधवारी पोटेगाव पोलीस ठाण्याच्या हद्दीतील गडचिरोली तालुक्यातील नागवेली येथे उघडकीस आली. सखाराम झगडु नरोटे (वय 33) असे मृत व्यक्तीचे नाव आहे.
1 सप्टेंबरच्या रात्री 20 ते 25 बंदुकधारी नक्षलवादी सखाराम नरोटे याच्या घरी गेले आणि त्याला व त्याचा भाऊ शामराव अलसु नरोटेला घरुन नेऊन मारहाण केली. त्यानंतर शामराव नरोटे यास गावात सोडुन दिले व सखाराम नरोटे यास जवळच असलेल्या हलामीटोला परिसरात घेऊन गेले. व येडमपायली ते हलामीटोला रोड बांधकाम ठेकेदाराकडून पैसे वसूल करुन नक्षलवादी पार्टीला दिले नाही, या कारणावरुन त्याला बंदुकीची गोळी झाडून ठार केले. सखाराम नरोटे हा सन 2015 पासून नक्षल समर्थक म्हणून कार्यरत असल्याची पोलीस दप्तरी नोंद आहे. तो नक्षलवाद्यांना मदत करीत होता.
गडचिरोली जिल्हा गेल्या ४० वर्षापासून नक्षलग्रस्त असून नक्षलवाद्यांचा पाया असलेल्या एआरडी/जिआरडी/जन मिलीशिया सुद्धा नक्षलवाद्यांच्या दहशतीला बळी पडत आहेत. नक्षलवाद्यांनी आजपर्यंत 535 पैकी काही सामान्य नागरिकांचा पोलीसांचे बातमीदार असल्याच्या संशयावरुन खून केला. तसेच नक्षलवाद्यांना मदत करणाऱ्या नक्षल समर्थकांचाही वैयक्तिक वाद आणि पैशांच्या वादावरुन खून केल्याच्या घटना उघडकीस आल्या आहेत.
हेही वाचा - पालकमंत्री एकनाथ शिंदेंकडून पूरग्रस्त भामरागडची पाहणी
