गडचिरोली - सिरोंचा तालुक्यातील असरअली येथील जिल्हा परिषद शाळेचे शिक्षक खुर्शिद शेख यांची केंद्र सरकारच्या शिक्षण मंत्रालयाने राष्ट्रीय शिक्षक पुरस्कारासाठी निवड केली आहे. केंद्रीय शिक्षण मंत्रालयाने देशभरातून नामांकन केलेल्या १५५ शिक्षकांपैकी ४५ शिक्षकांची राष्ट्रीय शिक्षक पुरस्कारासाठी निवड केली आहे. त्यात गडचिरोलीच्या सिरोंचा तालुक्यातील असरअली येथील खुर्शिद शेख आणि उस्मानाबाद जिल्ह्यातील उमेश खोसे या दोन शिक्षकांचा महाराष्ट्रातून समावेश आहे.
वेगवेगळ्या आनंददायी उपक्रमांची आखणी-
सिरोंचा हे तालुकास्थळ गडचिरोली जिल्हा मुख्यालयापासून दोनशे किलोमीटर अंतरावर आणि असरअली हे गाव सिरोंचा तालुकास्थळापासून ३० किलोमीटर अंतरावर आहे. तेलंगणा व छत्तीसगड राज्याच्या सीमेवर ते वसले आहे. असरअली गावात पहिली ते सातवीपर्यंत जिल्हा परिषदेची शाळा आहे. खुर्शिद शेख हे २०१३ मध्ये त्या शाळेत रुजू झाले, तेव्हा शाळेची पटसंख्या ४५ होती. शाळा जवळपास बंद पडण्याच्या मार्गावर होती. शाळेच्या या स्थितीची शेख यांनी स्वत:च कारणमीमांसा करण्यास सुरुवात केली.
पाठ्यपुस्तक आणि स्थानिक भाषेचा समन्वय-
राज्य शासनाची पुस्तके मराठी भाषेतून आहेत आणि असरअली परिसरातील नागरिकांची भाषा तेलगू आहे. भाषा हाच विद्यार्थ्यांच्या शिक्षणातील मुख्य अडसर असल्याचे त्यांच्या लक्षात आले. मग, शेख यांनी विविध उपक्रम राबविण्यास सुरुवात केली. शाळेत आनंदबाग तयार केली. विज्ञान प्रयोगशाळा उघडली. व्हर्च्युअल क्लासरुमही उघडली. सोबतच डॉ.बाबासाहेब आंबेडकरांच्या नावाने ग्रंथालय सुरु केलं. आज हे ग्रंथालय ३ हजार पुस्तकांनी सुसज्ज आहे.
एवढेच नाही, तर खुर्शिद यांनी ‘मी रिर्पोटर’ हा उपक्रमही सुरू केला. यामुळे विद्यार्थी माईकपुढे येऊन मराठी भाषा चांगल्याप्रकारे बोलू लागले. अशा वेगवेगळ्या आनंददायी उपक्रमांमुळे विद्यार्थ्यांचा भाषिक अडसर दूर झाला आणि बघताबघता शाळा गच्च भरायला लागली. आजमितीस या शाळेच्या ११ शॉर्ट फिल्म्स तयार झाल्या असून, विद्यार्थ्यांनीच त्यात अभिनय केला आहे. खुर्शिद शेख यांनी तेलगू भाषिक विद्यार्थ्यांना मराठी भाषेप्रती रुची निर्माण करुन त्यांना शिक्षणाबद्दल आवड निर्माण केल्याबद्दल केंद्रीय शिक्षण मंत्रालयाने त्यांची राष्ट्रीय शिक्षक पुरस्कारासाठी निवड केली आहे.
तसेच उस्मानाबाद जिल्ह्यातील उमरगा तालुक्यात कडदोरा येथील जिल्हा परिषद प्राथमिक शाळा जगदंबानगर येथे कार्यरत असलेले उमेश रघुनाथ खोसे यांना देखील केंद्र शासनाचा राष्ट्रीय आदर्श शिक्षक पुरस्कार जाहीर झाला आहे.
यापूर्वी महाराष्ट्रातील सोलापूर जिल्ह्यातल्या रणजीत डिसले यांना आंतराराष्ट्रीय पुरस्कार-
युनेस्को आणि लंडनस्थित वार्की फाऊंडेशन यांच्या संयुक्त विद्यमाने दिला जाणारा ग्लोबल टीचर पुरस्कार जाहीर झाला. सात कोटींचा हा पुरस्कार सोलापूरच्या परितेवाडी शाळेतले शिक्षक रणजीत डिसले यांना जाहीर झाला आहे. लंडनमधील नॅचरल हिस्ट्री म्युझियममध्ये झालेल्या कार्यक्रमात प्रसिद्ध अभिनेते स्टिफन फ्राय यांनी यासंदर्भातली घोषणा केली. हा पुरस्कार मिळवणारे रणजीत डिसले हे पहिले भारतीय शिक्षक ठरले आहेत.
हेही वाचा - सोलापूर जिल्ह्यातले शिक्षक रणजीत डिसले यांना 7 कोटींचा ग्लोबल टीचर पुरस्कार
