गडचिरोली - प्रशासन आणि जनता यांच्या परस्पर सहयोगातून शाश्वत विकासाकडे वाटचालीचे प्रारूप म्हणजे गडचिरोली जिल्ह्यातील दुर्गम असे नक्षलग्रस्त संवेदनशील आदिवासी वस्ती केडमारा गाव. या गावात पोलीस प्रशासन आणि ग्रामस्थांनी लोकसहभागातून बहुउद्देशीय तलावाची निर्मिती करत पाणीटंचाईची समस्या दूर केली आहे.
पोलिसांनी लोकसहभागातून शोधला समस्येवर उपाय
पोलीस मदत केंद्र ताडगावच्या पोलीस पथकाने केडमारा गावाला दिलेल्या ग्रामभेटीदरम्यान ग्रामस्थांनी पाणी तसेच शेतीसाठी पाण्याची भीषण टंचाई असल्याबाबत समस्या मांडली. यानंतर पोलीस अधीक्षक अंकित गोयल, यांच्या मार्गदर्शनात केडमारा गावातील पाणी समस्या सोडविण्याचा निर्णय पोलीस मदत केंद्र ताडगावचे प्रभारी अधिकारी उपनिरीक्षक सौरभ पिंगळे यांनी घेतला. या समस्येवर शाश्वत व बहूउद्देशीय उपाय शोधला, तो म्हणजे गावाला एक मोठा तलाव बांधून देणे. यासाठी ग्रामस्थांबरोबर बैठक घेवून पोलीस व लोकसहभागातून तलाव बांधण्याचे ठरले.
जुन्या तलावाचे केले पुनरूज्जीवन
पोलीस प्रशासनाच्या उपस्थितीत केडमारा गावाजवळील जुन्या तलावाचे खोलीकरण, रुंदीकरण करण्यात आले. तसेच उन्हाळ्यातही पाणी उपलब्ध रहावे, यासाठी तलावात मोठा हौद करण्यात आला. ज्यात गावकऱ्यांना मत्स्यशेतीव्दारे पर्यायी रोजगाराची संधी उपलब्ध झाली आहे. भविष्यात भूजल पातळीत वाढ होवून पेयजलाची समस्या दूर होण्यास मदत झाली आहे. शिवाय उन्हाळयात परिसरातील वन्यप्राणी, पशू-पक्षांना पाण्याचा एक शाश्वत स्त्रोत उपलब्ध झाला आहे. शिवाय पोलीस प्रशासन आणि गावकऱ्यांच्या मदतीमुळे गावाला पाण्याचा मोठा स्त्रोत मिळाला आहे.
हेही वाचा- 'ईटीव्ही भारत' इम्पॅक्ट : आई आणि मुलीला मिळालं नवीन आधार कार्ड; आंध्र प्रदेशातील घटना
