गडचिरोली - नक्षलदृष्ट्या अतिसंवेदनशील सावली येथे पोलीस विभागातर्फे जनजागरण मेळावा घेण्यात आला. यावेळी पोलीस दलाने जिल्ह्यातील बेरोजगार तरुण-तरुणींसाठी विकसित केलेल्या 'रोजगार मेळावा' या अॅपबद्दल माहिती दिली.
या अॅपमध्ये गरजू तरूण आपल्या आवडीच्या नोकरी संदर्भात माहिती भरू शकतात. याचा बेरोजगार तरुण-तरुणींना नोकरी मिळण्यासाठी मोठ्या प्रमाणात फायदा होणार आहे. या अॅपमध्ये कंपन्यांनादेखील आपली नाव नोंदणी करता येणार आहे. अप्पर पोलीस अधीक्षक मोहितकुमार गर्ग, उपविभागीय पोलीस अधिकारी जयदत्त भवर यांच्या उपस्थितीत हा मेळावा घेण्यात आला. या मेळाव्यात सावली, मसेली, कोरची, झेंडेपार, मुरकुटी, बिजेपार, कोटरा, जांभळी, दोडके, नवेझरी, लक्ष्मीपूर या गावांतील ४ ते ५ हजार नागरिकांनी सहभाग घेतला.
हेही वाचा - वसतीगृहाच्या मागणीसाठी अमरावतीत विद्यार्थ्यांचे आमरण उपोषण
नक्षलवादी आपल्या फायद्यासाठी आदिवासी बांधवांच्या मुलांना शिक्षण घेण्यापासून जाणीवपूर्वक वंचित ठेवतात. याकडे आदिवासी बांधवांनी गांभीर्याने पहावे व आपल्या मुलांना शाळेत पाठवावे, असे अप्पर पोलीस अधीक्षक मोहितकुमार गर्ग यांनी आवाहन केले.
मेळाव्यात उपस्थित असलेल्या नक्षलग्रस्त भागातील दिव्यांग व्यक्तिंना सायकल, शिलाई मशीन, अँड्रॉइड मोबाईल, भांडी, कपडे, तरुणांसाठी खेळाचे साहित्य, पाण्याची टाकी या जीवनावश्यक साहित्याचे वाटप करण्यात आले.
याच दरम्यान महिलांची संगीत खुर्ची स्पर्धा, तरुणांसाठी हॉलीबॉल स्पर्धा, कब्बडी स्पर्धा आयोजित करण्यात आली होती. या सर्व स्पर्धांमध्ये पुरुष व महिलांनी उत्स्फूर्तपणे सहभाग नोंदवला.
