गडचिरोली - भामरागडमध्ये आलेल्या महापुरामुळे येथील अनेक कुटुंब उध्वस्त झाली आहेत. सतत चार ते पाच दिवस भामरागडसह तालुक्यातील अनेक गावे पाण्याखाली होती. सध्या पूर ओसरला असून येथील पूरग्रस्तांच्या मदतीसाठी जिल्हा प्रशासनाने तब्बल ५५ पथके रवाना केली आहेत. या पथकाद्वारे मदत तसेच नुकसानीचे सर्वेक्षण करून पुढील दोन-तीन दिवसात पुरग्रस्तांना आर्थिक मदत जाहीर करणार असल्याची माहिती जिल्हाधिकारी शेखर सिंह यांनी दिली.
हेही वाचा - मुसळधार पावसाने सातव्यांदा तुटला भामरागडचा संपर्क ; पूरग्रस्तांचे सर्वेक्षण करणारा चमू अडकला
जिल्हाधिकारी म्हणाले, भामरागडला यावर्षी सातवेळा पुराचा फटका बसला आहे. छत्तीसगड राज्यात तसेच भामरागड तालुक्यात पडलेल्या पावसामुळे पर्लकोटा, पामुलगौतम व इंद्रावती या तिन्ही नद्यांना महापूर आला. हा पूर १९९४ नंतरचा सर्वात मोठा पूर होता. या पुराची अगोदरच माहिती मिळाल्याने येथील अडीच हजाराहून अधिक नागरिकांना अगोदरच सुरक्षित स्थळी हलवण्यात आले होते. आता पूर ओसरला असून भामरागडसह अनेक गावांमध्ये चिखल झाल्याने आरोग्याची मोठी समस्या निर्माण झाली आहे. त्यामुळे तात्काळ जिल्हा आरोग्य विभागाचा चमू भामरागड मध्ये पाठवण्यात आला असून या यात १५ डॉक्टरांचा समावेश आहे.
हेही वाचा - वैनगंगेला पूर; नदीकाठच्या गावांना सतर्कतेचा इशारा
नुकसानीचे सर्वेक्षण करण्यासाठी विविध तालुक्यामधल्या १५ तलाठी पाठवण्यात आले आहेत. तसेच १० कनीष्ठ इंजिनियर, ५ पशुवैद्यकीय डॉक्टर असे विविध ५५ पथके भामरागड तालुक्यात रवाना करण्यात आली आहेत. पुढील दोन दिवसात सर्वेक्षण पूर्ण होणार असून सर्व पूरग्रस्तांना जिल्हा प्रशासनाकडून आर्थिक मदत घोषित करण्यात येणार आहे. सध्या सामाजिक संघटनांच्या पुढाकारातून विविध साहित्य वाटप करण्याचे काम सुरू आहे. ज्यांचे घर पूर्णत: कोसळले किंवा घराचे नुकसान झाले, अशांना दोन दिवसात मदत देण्यात येईल. नागरिकांनी आरोग्याची काळजी घेत पिण्याचे पाणी उकळूनच प्यावे, असे आवाहनही सिंह यांनी यावेळी केले.
हेही वाचा - परदेशातून कांद्याची आयात, शेतकरी-व्यापारी नाराज
