गडचिरोली - जिल्ह्यातील शहरी भागात नागरिक कोरोनाविषयी विशेष खबरदारी बाळगताना दिसत नाही. मात्र, दुब्बागुडा या आदिवासी बहुल गावातील नागरिकांनी गावात कोणालाही प्रवेश करण्यास बंदी घातली आहे. तसेच गावाच्या वेशीवर बैलगाडी आडवी ठेवून परवानगी शिवाय आत येऊ नये, असे बॅनर लावले आहे. त्यामुळे या गावकऱ्यांचे सर्वत्र कौतुक केले जात आहे.
दिवसेंदिवस कोरोना विषाणूचे रुग्ण वाढत चालले आहेत. सध्या शहरी भागात कोरोनाचा प्रभाव दिसून येत आहे. योग्य ती खबरदारी न घेतल्यास भविष्यात ग्रामीण भागात देखील ही साथ पसरण्याची शक्यता नाकारता येत नाही. त्यामुळे जिल्हा प्रशासनातर्फे सर्वांना खबरदारी बाळगण्याच्या सूचना दिल्या जात आहेत. महसूल, पोलीस आणि नगर पंचायत प्रशासनाने दिलेल्या सूचनेचे दुब्बागुडा ग्रामस्था काटेकोरपणे पाल करत आहेत. तसेच २२ मार्चच्या जनता कर्फ्युमध्ये सहभागी झाल्यानंतर आता २१ दिवसाचा देशव्यापी बंद देखील पाळणार असल्याचे ग्रामस्थांनी सांगितले. तसेच गावात कोणीही येऊ नये, असे बॅनर लावण्यात आले आहे. कोरोना विषाणूबाबत बाहेरच्या नागरिकांना गावात बंदी घालणारे हे जिल्ह्यातील पहिले गाव आहे.
