गडचिरोली - महाराष्ट्र राज्य माध्यमिक व उच्च माध्यमिक शिक्षण मंडळाने आज 28 मे रोजी दुपारी 1 वाजता इयत्ता बारावीचा ऑनलाईन निकाल जाहीर केला. यामध्ये गडचिरोली जिल्ह्याचा निकाल 68.80 टक्के इतका लागला आहे. गडचिरोली येथील शिवाजी कनिष्ठ विज्ञान महाविद्यालयाचा प्रत्यय उराडे याने 92.15 टक्के गुण प्राप्त करून जिल्ह्यात प्रथम तर प्लॉटीनम ज्युबिली हायस्कूलचा प्रणय पारटवार हा 91.85 टक्के गुण घेऊन द्वितीय क्रमांकांने पास झाला आहे.
जिल्ह्यातील 12 हजार 897 विद्यार्थ्यांनी परीक्षा दिली होती. यापैकी 8 हजार 873 विद्यार्थी उत्तीर्ण झाले आहेत. यामध्ये 107 विद्यार्थी गुणवत्ता श्रेणीत उत्तीर्ण झाले आहेत. तर 1 हजार 218 विद्यार्थी प्रथम श्रेणीत, 6 हजार 378 विद्यार्थी द्वितीय श्रेणीत तर 1 हजार 170 विद्यार्थी तृतीय श्रेणीत उत्तीर्ण झाले आहेत. जिल्ह्यातील 4 शाळांचा निकाल 100 टक्के लागला आहे. यामध्ये गोंडवाना सैनिकी विद्यालय गडचिरोली, केवळराम हरडे ज्यु. कॉलेज चामोर्शी, शिवाजी ज्यु. कॉलेज कुरखेडा, विद्याभारती हायस्कुल तथा ज्यु. कॉलेज कुरखेडा या शाळांचा समावेश आहे.
जिल्ह्यातील शाळांमधून चामोर्शी तालुक्याचा बारावीचा निकाल 76.91 टक्के लागला असून बाराही तालुक्यातून चामोर्शी तालुक्याने निकालात बाजी मारली आहे. तर सर्वात कमी निकाल 41.32 टक्के अहेरी तालुक्याचा लागला आहे. तर भगवंतराव हिंदी हायस्कूल गडचिरोलीचा शून्य टक्के निकाल लागला आहे.
तालुकानिहाय निकालाची टक्केवारी-
- गडचिरोली - 72.26
- अहेरी - 41.32
- आरमोरी - 63.83
- भामरागड - 48.42
- चामोर्शी - 76.91
- देसाईगंज - 76.55
- धानोरा - 69.55
- एटापल्ली - 61.30
- कोरची - 68.95
- कुरखेडा - 73.82
- मुलचेरा - 73.70
- सिरोंचा - 69.80
- एकूण - 68.80
