धुळे : विविध मागण्यांसाठी कर्मचाऱ्यांचे देशव्यापी आंदोलन

केंद्र सरकारच्या कामगारविरोधी कायद्यांविरोधात आज देशव्यापी संप घोषित करण्यात आला होता. या संपात आज धुळ्यातील विविध क्षेत्रीतील कर्मचारी सहभागी झाले होते.

धुळे - केंद्र सरकारच्या शेतकरी तसेच कामगारविरोधी धोरणांच्या निषेधार्थ धुळ्यात कामगार संघटना एकवटल्या असून कोरोनामुळे मोर्चा काढण्याचा निर्णय रद्द करत संघटनांनी मोठी मानवी साखळी तयार करत आंदोलनाकडे शासनाचे लक्ष वेधून घेतले. आजच्या देशव्यापी संपामुळे बँकांमध्येही शुकशुकाट दिसून आला. तसेच यावेळी जिल्हा परिषदेतील कर्मचाऱ्यांनी काळ्या फिती लावून आपला निषेध नोंदविला.

या आहेत कामगारांच्या मागण्या-

सर्व गरजूंना पुढील सहा महिन्यांसाठी दरडोई दहा किलो धान्य मोफत द्यावे, रेशन व्यवस्था बळकट करून त्यात रॉकेल आणि साखरसह जीवनावश्यक वस्तूंचा पुरवठा करावा, पेट्रोल डिझेलवरील करांमध्ये कपात करावी, मनरेगाअंतर्गत 600 रुपये रोजंदारी द्यावी तसेच 200 दिवस काम द्यावे, वित्त क्षेत्रातील सर्व सार्वजनिक क्षेत्र उद्योगांचे खाजगीकरण थांबवावे यासह विविध मागण्यांसाठी आंदोलन करण्यात आले. या आंदोलनात सार्वजनिक क्षेत्रातील कामगार शेतकरी शेतमजूर मच्छीमार पशुपालक ग्रामीण कारागीर असंघटित क्षेत्रातील कामगार कर्मचारी महिला सहभागी झाल्या होत्या.

कोरोनाच्या संकटात नियमांचे उल्लंघन-विविध मागण्यांसाठी राज्य सरकारी कर्मचारी संघटनेसह विविध संघटनांच्या आंदोलनादरम्यान तसेच कोरोनाच्या संकटात शासनाच्या नियमांचे आंदोलनाच्या ठिकाणी सर्रासपणे उल्लंघन करण्यात आले. यावेळी सामाजिक अंतराचा पूर्णपणे फज्जा उडाला होता. आंदोलनकर्त्यांनी मास्कचा वापर केलेला नव्हता.