धुळे : शिंदे सरकारने ( Shinde group ) यंदाच्या दिवाळीत स्वस्त धान्य दुकानातून शिधा पत्रिका धारकांना ( Ration card holders ) शंभर रुपयात एक किलो साखर, एक किलो रवा, एक किलो चणा डाळ, एक किलो तेल या चार वस्तू मिळतील अशी घोषणा केली. साधारण १० ते १५ वर्षानंतर केशरी शिधा पत्रिका धारकांना दिवाळीत साखर, तेल, रवा, चणा डाळ या चार वस्तू मिळत असल्याने शिधा पत्रिका धारकांमध्ये विशेषतः केशरी शिधा पत्रिका धारकांमध्ये या विषयी उत्सुकता, कुतूहल होते. मात्र दिवाळी संपल्यानंतर धुळे जिल्ह्यातील स्वस्त धान्य दुकानांमध्ये हा शिधा पोहोचला. तो देखील साखरेविना, ( Diwali ration was given without sugar ) त्यामुळे हा शिधा घेतांना ग्राहकांच्या चेहऱ्यावर ना पूर्ण आनंद दिसला, ना गोडवा.
८ शासकीयगोदाम, ९८८ स्वस्त धान्य दुकानातून सुरु झालंय वितरण : धुळे जिल्ह्यात अंत्योदय योजनेंतर्गत ७४ हजार ७३६ तर प्राधान्य कुटुंब अंतर्गतअर्थात केशरी कार्ड धारक २ लाख २४ हजार १८० इतके लाभार्थी आहेत. असे हे दोन्ही प्रकारचे लाभार्थी मिळून एकूण २ लाख ९८ हजार ९१६ लाभार्थी आहेत. यानुसार धुळे जिल्ह्यात २ लाख ९८ हजार ९१६ दिवाळी रेशन किटचे वितरण करण्याची लगभग सध्या सरकारी पातळीवर सुरु झाली आहे. धुळे जिल्ह्यातील धुळे, शिरपूर, साक्री, पिंपळनेर, नरडाणा, शिंदखेडा, दोंडाईचा, होळनांथे या आठ शासकीय गोदामातून जिल्ह्यातील ९८८ स्वस्त धान्य दुकानांच्या माध्यमातून हे वितरण सध्या सुरु आहे. मुख्यमंत्री एकनाथ शिंदे यांनी जाहीर केल्यानुसार प्रत्येक स्वस्त धान्य (रेशन ) दुकानातून अंत्योदय आणि प्राधान्य कुटुंब योजनेच्या लाभार्थींना अवघ्या शंभर रुपयात एक किलो हरबरा चणा डाळ, एक किलो साखर, एक किलो रवा, एक किलो पामतेल या चार वस्तू मिळणार आहे.
केवळ धुळे जिल्ह्यातील स्वस्त धान्य दुकानदारांसाठीच ही मुभा : शिंदे सरकारच्या या महत्वाकांक्षी योजनेची अंमलबजावणी तत्परतेने करण्यासाठी, तसेच लाभार्थ्यांची गैरसोय होऊ नये म्हणून धुळे जिल्ह्यातील स्वस्त धान्य दुकान चालकांनी या दिवाळी किट अगोदर उपलब्ध करून त्यांचे लाभार्थींना तात्काळ वितरण करावे, त्या नंतर या किट साठीचा सरकारी भरणा करावा अशी मुभा स्थानिक पातळीवर देण्यात आली आहे, जेणेकरून वितरणाला अडचणी येऊ नयेत, लाभार्थ्यांना देखील तत्परतेनं हे किट उपलब्ध व्हावे, हा त्यामागचा उद्देश असल्याचे सहाय्यक जिल्हा पुरवठा अधिकारी मुकेश कांबळे यांनी सांगितले.
