धुळे - जिल्ह्यातील शिंदखेडा तालुक्यातील बेटावद येथील रेणुका देवीची ध्वज यात्रा कोरोनामुळे रद्द करण्यात आली आहे. या यात्रा उत्सवाला दोनशे वर्षांची परंपरा लाभली आहे.
शिंदखेडा तालुक्यातील बेटावद येथून दरवर्षी चैत्र पौर्णिमेनिमित्त श्री सप्तशृंगी गडावर ध्वजयात्रा काढली जाते. बेटावद येथून नेण्यात आलेला ध्वज श्री सप्तशृंगी देवीच्या कळसावर लावण्याची प्रथा आहे. गेल्या दोनशे वर्षांची परंपरा या यात्रोत्सवाला असून हा ध्वज बेटावद ते वणी येथील सप्तशृंगी गडापर्यंत पायी नेला जातो. मात्र, यंदा कोरोनामुळे ही यात्रा रद्द करण्यात आली आहे. मागील दोनशे वर्षांत प्रथमच यात्रा रद्द होत असल्याने भाविकांनी नाराजी व्यक्त केली आहे. बेटावद येथे श्री रेणुका देवीचे प्राचीन मंदिर असून हा ध्वज नेण्याची परंपरा बुवा कुटुंबीयांकडे आहे. यंदा बेटावद येथे चैत्र पौर्णिमेचा उत्सव देखील साध्या पद्धतीने साजरा करण्याचा निर्णय ट्रस्टच्या वतीने घेण्यात आला आहे.
हेही वाचा - लॉकडाऊन : 'सोशल डिस्टन्सिंग'चा धुळ्यात भाजपकडून फज्जा
