धुळे - खासदार हिना गावित यांना लोकसभेची उमेदवारी दिल्यास मराठा क्रांती मूक मोर्चा त्यांच्या विरोधात प्रचार करेल, असे निवेदन धुळे जिल्हा मराठा क्रांती मूक मोर्चाच्यावतीने भाजपचे प्रदेशाध्यक्ष रावसाहेब दानवे यांना देण्यात आले आहे. मराठा समाज बांधवांवर गुन्हा दाखल केला म्हणून त्यांच्या उमेदवारीला विरोध करण्यात आला आहे.
मागील वर्षी आरक्षणाच्या मागणीसाठी मराठा क्रांती मूक मोर्चाच्यावतीने धुळे जिल्हाधिकारी कार्यालयासमोर आंदोलन सुरु होते. यावेळी जिल्हा नियोजन समितीच्या बैठकीसाठी आलेल्या खासदार हिना गावित यांच्या वाहनाची काही उत्साही कार्यकर्त्यांकडून तोडफोड करण्यात आली होती. या घटनेनंतर मराठा क्रांती मूक मोर्चाच्यावतीने पत्रकार परिषद घेऊन हिना गावित यांची माफी मागण्यात आली. मात्र, त्यानंतर देखील त्यांनी मराठा समाजातील तरुणांवर आणि कार्यकर्त्यांवर अॅट्रॉसिटीचा गुन्हा दाखल केला.
हिना गावित यांनी अशाप्रकारे अॅट्रॉसिटीचा गुन्हा दाखल करून मराठा आणि आदिवासी समाजात तेढ निर्माण करण्याचा प्रयत्न केला होता. या पार्श्वभूमीवर त्यांना नंदुरबार लोकसभा मतदार संघातून उमेदवारी देण्यात येऊ नये. जर त्यांना उमेदवारी दिल्यास मराठा क्रांती मूक मोर्चा त्यांच्याविरोधात प्रचार करेल, असे पत्र धुळे जिल्हा मराठा क्रांती मूक मोर्चाच्यावतीने भाजपचे प्रदेशाध्यक्ष रावसाहेब दानवे यांना देण्यात आले आहे. मराठा क्रांती मूक मोर्चाच्या या पत्राची दखल घेऊन हिना गावित यांच्या उमेदवारीबाबत कोणता निर्णय होणार, याकडे सर्वांचे लक्ष लागून आहे.
