धुळे - शिरपूर तालुक्यातील बोरपाणी गावातून पोलिसांनी लाखो रुपयांचा दारुसाठा आणि स्पिरिटचा साठा जप्त केला आहे. आज रविवारी पोलिसांनी ही कारवाई केली. मात्र, यातील आरोपी फरार झाला आहे.
शिरपूर पोलिसांना मिळालेल्या गुप्त माहितीच्या आधारे बोरपाणी गावातील वेस्ता पावरा या व्यक्तीच्या घरात मोठ्या प्रमाणात अवैधरित्या दारू व स्पिरिटचा साठा लपवून ठेवला असून या व्यक्तीकडून धुळे जिल्ह्यात विविध ठिकाणी हा दारुसाठा पुरविला जातो. याची गुप्त माहिती पोलिसांना मिळाली होती. त्याद्वारे पोलिसांनी बोरपाणी गावात जाऊन वेस्ता पावरा यांच्या घरात छापा टाकला. यावेळी घरात मोठ्या प्रमाणात अवैध दारुचे बॉक्स व स्पिरिटचा साठा आढळून आला.
दरम्यान, पोलीस येत असल्याची चाहूल लागताच वेस्ता पावरा हा व्यक्ती मागच्या दाराने फरार झाला. पोलिसांनी त्याचा पाठलाग केला. मात्र, तो झुडपाचा आधार घेत फरार झाला. पोलिसांनी अवैध दारू व स्पिरिटचा साठा जप्त केला आहे. फरार झालेल्या वेस्ता पावरा यावर गुन्हा दाखल करण्यात आला असून पोलीस त्याचा शोध घेत आहेत.
