चंद्रपूर - जिल्ह्यातील एका नामांकीत अदिवासी मुलींच्या वसतिगृहामधील काही मुलींचे लैंगिक शोषण झाल्याची धक्कादायक घटना समोर आली आहे. यापैकी २ मुलींना शासकीय रुग्णालयात भरती करण्यात आले आहे. यापैकी एक मुलगी ९ वर्षांची तर दुसरी मुलगी १० वर्षांची आहे. हा प्रकार वसतिगृहात घडल्याची चर्चा या परिसरात आहे. याची कसून चौकशी पोलीस करीत आहेत.
संबंधित संस्थेतील आदिवासी वसतिगृहातील मुली गेल्या काही महिन्यांपासून अचानक बेशुद्ध पडत होत्या. त्यांना ग्रामीण रुग्णालयात भरती करून थातुरमातूर उपचार केले जात होते. असे सातत्याने होत होते. मागील आठवड्यात, अशाच २ मुलींना भरती करण्यात आले होते. त्यामुळे येथील डॉक्टरांना शंका आली. या मुलींची शारीरिक तपासणी केली असता त्यांच्या गुप्तांगावर सूज असल्याचे दिसून आले. त्यानंतर हा धक्कादायक अमानुष प्रकार उघडकीस आला.
या मुलींची तब्येत बिघडल्याने त्यांना चंद्रपूर येथील रुग्णालयात भरती करण्यात आले. ही बाब एका सामाजिक संस्थेच्या सदस्यांना माहिती झाली. यानंतर त्यांनी पोलिसांत तक्रार दिली. त्यानुसार या वसतिगृहातील अधिकारी आणि कर्मचाऱ्यांची कसून चौकशी करण्यात आली. मात्र, याबाबत अद्याप कुणावरही गुन्हा दाखल करण्यात आलेला नाही. चौकशीअंती कारवाई होईल, असे जिल्हा पोलीस अधीक्षकांचे म्हणणे आहे.
यापूर्वी नोव्हेंबरमध्ये याच संस्थेत असाच एक प्रकार समोर आला होता. ज्यात नर्सिंग महाविद्यालयातील विद्यार्थिनीचा प्राचार्य शारीरिक छळ करीत होता. हा प्रकार उघडकीस आल्यानंतर या प्राचार्यांची हकालपट्टी करण्यात आली होती. आता तर त्याहूनही धक्कादायक प्रकार समोर आला आहे.
