खासगी रुग्णालयातील अँटीजेन चाचणी केंद्र बंद करा - खासदार बाळू धानोरकर

खासगी अँटीजेन चाचणी केंद्रात केलेल्या चाचणीच्या अहवाल अनेकदा पॉझिटिव्ह येत असतो. तर, त्याच व्यक्तीने शासकीय रुग्णालयात केलेली चाचणी ही अनेकदा निगेटिव्ह येत आहे. सामान्य जनतेची लूट होत असल्याने हे खासगी अँटीजेन चाचणी केंद्र बंद करण्याच्या सूचना खासदार बाळू धानोरकर यांनी जिल्हाधिकाऱ्यांना केल्या.

चंद्रपूर - जिल्ह्यात काही दिवसांपासून कोरोनाबाधितांची संख्या झपाट्याने वाढत चालली आहे. त्याची दखल घेत प्रशासनाने शहरातील १६ खासगी दवाखाने अधिग्रहित केले. मात्र, या रुग्णालयातून बाधितांची लुट सुरू असल्याच्या तक्रारी मिळत आहेत. याची दखल खासदार बाळू धानोरकर यांनी घेतली. रविवारी विश्रामगृहात तातडीने बैठक घेत लूट थांबविण्याचे निर्देश दिले.

खासदार धानोरकर यांनी एका दिवसात चौकशी करून अहवाल सादर करण्याच्या सूचना मनपा आयुक्तांना दिल्या होत्या. खासदारांच्या सूचनेप्रमाणे मनपा आयुक्तांनी विविध महत्वाच्या उपायोजना आणि कारवाई केली आहे. त्यासोबतच खासगी अँटीजेन चाचणी केंद्रात केलेल्या चाचणीच्या अहवाल अनेकदा पॉझिटिव्ह येत असतो. तर, त्याच व्यक्तीने शासकीय रुग्णालयात केलेली चाचणी ही अनेकदा निगेटिव्ह येत आहे. सामान्य जनतेची लूट होत असल्याने हे खासगी अँटीजेन चाचणी केंद्र बंद करण्याच्या सूचना खासदार बाळू धानोरकर यांनी जिल्हाधिकाऱ्यांना केल्या. या बैठकीला मनपा आयुक्त राजेश मोहिते, जिल्हाध्यक्ष ओबीसी कमेटी उमाकांत धांडे, प्रवीण पडवेकर, गोपाळ अमृतकर, एन. एस. यू. आय प्रदेश महासचिव कुणाल चहारे, ज्येष्ठ नेते विनोद दत्रात्रय, अल्पसंख्याक जिल्हाध्यक्ष सोहेल रजा, मनपाचे वैद्यकीय अधिकारी अविष्कार खंडारे यांची उपस्थिती होती.

मानवटकर हॉस्पिटलला 42 हजारांचा दंड
सामान्य माणसाची लूट थांबवण्याकरता या खासगी रुग्णालयासमोर शासनाच्या दिशानिर्देशाप्रमाणे आकारण्यात येणाऱ्या दराचे फलक, त्याचसोबत सिटीस्कॅन केंद्रावर देखील शासकीय दराचे फलक लावण्याच्या सूचना खासदार धानोरकर यांनी आयुक्त राजेश मोहिते यांना केल्या. खासदार बाळू धानोरकर यांनी सूचना केल्याप्रमाणे महानगरपालिका आयुक्तांनी पथके निर्माण केली. या पथकाने जादा आकारणी करणाऱ्या डॉ. मानवटकर यांच्यावर ४२ हराजांच्या दंड ठोठावला. त्याचप्रमाणे इतर रुग्णांचे पैसेदेखील परत केले.

पीपीई किटबाबत आरोग्यमंत्र्यांना पत्र
पीपीई किटची किमत पाचशे रुपये आहे. मात्र, या किटसाठी बाराशे ते पंधराशे रुपये खासगी रुग्णालयातून घेतले जात आहे. कोरोनाबाधितांच्या रक्त तपासण्या करण्यात येतात, त्यासाठी अव्वाच्या सव्वा पैसे घेतले जात आहे. अशीच लूट रुग्णवाहिकाधारकही करत आहेत. त्यामुळे शासनाच्या निर्देशाप्रमाणे आकारण्यात येणाऱ्या दिशानिर्देशनेत पीपीई किटचा समावेश करावा, अशी मागणी खासदार धानोरकर यांनी आरोग्यमंत्री राजेश टोपे यांना प्रत्राद्वारे केली आहे.

हेही वाचा - राजुऱ्याला परतीच्या पावसाचा मोठ्या फटका; पिकांचे नुकसान झाल्याने शेतकरी चिंतेत