खासदार धानोरकरांची जीभ घसरली, पंतप्रधान नरेंद्र मोदींबद्दल केलं 'हे' आक्षेपार्ह विधान

पंतप्रधान नरेंद्र मोदी यांच्यावर टीका करताना धानोरकर यांनी अत्यंत आक्षेपार्ह शब्दाचा वापर केला आहे. त्याच्या या भाषणाचा व्हिडीओ व्हायरल झाला आहे. त्यामुळे धानोरकर यांच्या अडचणीत वाढ होण्याची शक्यता आहे.

चंद्रपूर: सभेत उपस्थित जनतेकडून प्रतिसाद मिळवण्याच्या नादात नेते अनेकदा बेताल वक्तव्य करून जातात. यात कधी आक्षेपार्ह भाषेचा वापरही केला जातो. चंद्रपूरातील काँग्रेसचे खासदार बाळू धानोरकर यांचाही असाच एक प्रताप समोर आला आहे. पंतप्रधान नरेंद्र मोदी यांच्यावर टीका करताना धानोरकर यांनी अत्यंत आक्षेपार्ह शब्दाचा वापर केला आहे. त्यांच्या या भाषणाचा व्हिडीओ व्हायरल झाला आहे. त्यामुळे धानोरकर यांच्या अडचणीत वाढ होण्याची शक्यता आहे.

लोकसभा निवडणुकीत काँग्रेसने नरेंद्र मोदी यांच्यावर जहरी टीका करण्याचे टाळले. उलट त्यावेळी राष्ट्रीय अध्यक्ष असलेले राहुल गांधी यांनी आपण जहरी टीकेचे प्रत्युत्तर प्रेमाने देऊ, कारण काँग्रेसची ही संस्कृती नाही, असे वारंवार जाहीर सभेत सांगितले. याच निवडणूकीच्या पार्श्वभूमीवर शिवसेनेत असलेले बाळू धानोरकर यांनी काँग्रेसचे तिकीट मिळवले आणि निवडूनही आले. राज्यातून निवडून आलेले ते काँग्रेसचे एकमेव खासदार आहेत. म्हणून त्यांची काँग्रेसच्या गोटात पतही वाढली आहे. मात्र, काँग्रेसच्या संस्कृतीत मिसळायला त्यांना अजून जमले नसल्याचे दिसत आहे. धानोरकर यांच्या आजच्या भाषणातून हे समोर आले आहे. जिल्हाधिकारी कार्यालयासमोर अवकाळी पावसामुळे शेतकऱ्यांच्या झालेल्या नुकसानभरपाई संदर्भात काँग्रेसतर्फे धरणे आंदोलन करण्यात आले होते. यावेळी संबोधीत करताना धानोरकर यांचा तोल सुटला. त्यांनी पंतप्रधान नरेंद्र मोदींवर अत्यंत खालच्या शब्दात टीका केली. या भाषणाचा व्हिडिओ आता व्हायरल झाला आहे. त्यामुळे धानोरकर यांच्या अडचणींत वाढ होण्याची शक्यता आहे.