चंद्रपूर - सिंदेवाही तालुक्यातील गडबोरी गावात घरात झोपलेल्या तान्हुल्याल्या बिबट्याने पळवल्याची घटना घडली. या हल्ल्यात ९ महिन्याच्या बाळाचा मृत्यू झाला.
स्वराज सचिन गुरूनुले, असे या बाळाचे नाव आहे. तो घरी झोपेत असताना शनिवारी रात्री ३ वाजण्याच्या सुमारास बिबट्याने घरात शिरून अलगद उचलले व तिथून बाहेर धूम ठोकली. बाळाचा आवाज आणि झालेली हालचाल पाहून घरचे लोक जागे झाले. मात्र, तोपर्यंत बिबट्या बाळाला घेवून गावाच्या बाहेर निघून गेला होता. पायाच्या खुणावरून बिबट्या असल्याचे लक्षात आल्याने गावकऱ्यांनी ही बाब सिंदेवाही वनपरिक्षेत्र वनविभाग व पोलिसांना कळविली. दोन्ही विभागाचे कर्मचारी, गावकरी यांनी शोध घेतला असता वाकल रोडवर तलावाजवळ बांबूच्या झुडुपात छिन्नविछिन्न अवस्थेत स्वराजचा मृतदेह आढळला. बिबट्याने स्वराजचा एक पायच तोडून नेल्याचे एका प्रत्यक्षदर्शीने सांगितले. या घटनेने परिसरात मोठी दहशत निर्माण झाली आहे. पोलीस व वनविभागाचे अधिकारी घटनास्थळी चौकशी करीत आहे. गावकरी आणि वनविभागाचे अधिकाऱ्यांत घटनेच्या सत्यतेवरून वाद होत असून यामुळे गावात तणाव निर्माण झाला आहे.
