मुंबई - वैद्यकीय शिक्षण घेणाऱ्या मराठा विद्यार्थ्यांचा आरक्षणाचा तिढा अद्यापही सुटलेला नाही. आझाद मैदानात विद्यार्थी आंदोलनाला बसले आहेत. राष्ट्रवादीचे नेते अजित पवार आणि राज्यातील ज्येष्ठ नेते राधाकृष्ण विखे-पाटील यांनी या संदर्भात वैद्यकीय शिक्षण मंत्री गिरीश महाजन यांची भेट घेतली आहे.
विद्यार्थ्यांचा प्रश्न सोडवायला २-४ दिवस जातील, असे गिरीश महाजन यांनी सांगितले आहे. उद्या प्रवेश घेण्याची शेवटची तारीख आहे ती वाढवण्यात येईल, असे महाजन यांनी आझाद मैदानात विद्यार्थ्यांची भेट घेतली तेव्हा सांगितले. परंतु, मुदत वाढवल्याची नोटीस आमच्या हातात येत नाही तोपर्यत आम्ही आझाद मैदान सोडणार नाही, अशी भूमिका विद्यार्थ्यांनी घेतली आहे.
विद्यार्थ्यांच्या जागा महत्त्वाच्या आहेत. त्या वाचल्या पाहीजेत. उद्यापासून प्रवेश प्रक्रिया सुरू होणार होती. ती प्रवेश प्रक्रिया आम्ही पुढे ढकलली आहे. आम्ही कायद्याच्या सर्व बाजू तपासत आहोत. चांगल्या वकिलांची फौज सुद्धा उभी केलेली आहे. आचारसंहितामुळे अध्यादेश काढता येत नाही. सर्वोच्च न्यायालय २ दिवसात निर्णय देणार आहे, याची वाट पाहात आहोत, असेही महाजन यांना स्पष्ट केले.
