बुलडाणा- चिखली येथील महात्मा फुले नागरी सहकारी पतसंस्थेमध्ये अपहार केल्या प्रकरणी बुलडाणा आर्थिक गुन्हे शाखेने दोन आरोपींना अटक केली आहे. आर्थिक गुन्हे शाखेच्या पथकाने १८ नोव्हेंबर रोजी आरोपींना चिखलीतील त्यांच्या राहत्या घरी सापळा रचून अटक केली. आरोपींना न्यायालयात हजर केले असता त्यांना ५ दिवसाची पोलीस कोठडी सुनावण्यात आली आहे.
महात्मा फुले नागरी सहकारी पतसंस्था, चिखलीचे अध्यक्ष दत्तात्रय गणपत खरात, व्यवस्थापक सतीश प्रल्हाद वाघ, रोखपाल परमेश्वर सुखदेव पवार, राऊतवाडी शाखा व्यवस्थापक गणेश कचरूजी खंडागळे यांच्याविरूद्ध पतसंस्थेत अपहार केल्याप्रकरणी १२ जुलै २०१९ रोजी चिखली पोलीस ठाण्यामध्ये गुन्हा नोंदविण्यात आला होता. खोटे व बनावट रोख कर्ज प्रकरणे तयार करून ठेवीदारांच्या पैशातून १ कोटी ४७ लाख २० हजार ३२९ रुपये उचल करून अपहार केल्याचा आरोप उपरोक्त व्यक्तींवर आहे. या प्रकरणाचा तपास बुलडाणा आर्थिक गुन्हे शाखेकडे हस्तांतरीत करण्यात आला. आर्थिक गुन्हे शाखेच्या तपासात सदर आरोपींनी ४ कोटी २४ लाख ५८ हजार ८८ रुपयांचा अपहार केल्याचे निष्पन्न झाले.
गुन्हा दाखल झाल्यानंतर वरील चारही आरोपी फरार होते. दरम्यान, 17 नोव्हेंबरच्या मध्यरात्री आर्थिक गुन्हे शाखेचे पोलीस उपअधीक्षक दिलीप तडवी यांना आरोपी सतीश वाघ व परमेश्वर पवार हे चिखली शहरातील आपल्या राहत्या घरी येणार असल्याची गोपनीय माहिती मिळाली होती. त्यानुसार आर्थिक गुन्हे शाखेच्या पथकाने सापळा रचून शिताफीने वरील दोन्ही आरोपींना अटक केली. ही कारवाई पोलीस अधीक्षक डॉ. दिलीप पाटील-भुजबळ, अपर पोलीस अधीक्षक संदीप पखाले यांच्या नेतृत्वात करण्यात आली. दोन्ही आरोपींच्या घराची आणि पतसंस्थेची झाडाझडती करून महत्वाचे कागदपत्रे जप्त करून त्यांना न्यायालयात हजर केले असता त्यांना ५ दिवसांची पोलीस कोठडी सुनावण्यात आली. सदर कारवाईमध्ये आर्थिक गुन्हे शाखेचे डी.वाय.एसपी तडवी, पी.एस.आय दिगंबर अंभोरे, कर्मचारी सरदार बेग, रामू मुंढे, निशांत चव्हाण, किरण भुजबळ, सिमा भुतेकर व चालक सचिन गायगोळ यांचा सहभाग होता.
हेही वाचा- चिखलीत पोलिसांकडून लाखोंचा गुटखा जप्त, एक आरोपी गजाआड तर एक फरार
