बुलडाणा - राज्यात डेल्टा प्लसचे 10 रुग्ण सोमवारी आढळले आहेत. यातील सहा रुग्ण हे कोल्हापुरात आढळले आहेत. राज्यात एकूण रुग्णाची संख्या आता 76 झाली आहे. नागरिकांनी चिंता करण्याची काहीही गरज नाही मात्र सर्वांनी नियम पाळत काळजी घेण्याची गरज आहे, असे आवाहन आरोग्यमंत्री राजेश टोपे यांनी केले आहे. खांमगावच्या सिल्वर सिटी रुग्णालयात सुरू करण्यात येणाऱ्या एमआरआय आणि सिटीस्कॅनचे उद्घाटनसाठी टोपे आले होते. त्यांनी दिलीपकुमार सानंदा यांच्या निवासस्थानी भेट दिली त्यावेळी ते पत्रकारांशी बोलत होते.
कोरोना आणि डेल्टा प्लसच्या लक्षणात, उपचारामध्ये फरक नाही -
राज्यात आतापर्यंत डेल्टा प्लसचे 76 रुग्ण आढळले आहेत. रुग्णांची आणि संपर्कातील लोकांची तपासणी सुरू आहे. आरोग्य विभागाकडून दर आठवड्याला प्रत्येक जिल्ह्यात 100 नागरिकांची तपासणी होत आहे, जे कोणी बाधित आढळत आहे त्यांच्यावर तात्काळ उपचार करण्यात येत आहेत. कोरोना आणि डेल्टा प्लसच्या लक्षणात आणि उपचारांमध्ये फार काही फरक नाही. त्यामुळे चिंता करण्याचा विषय नसला तरी आपण काळजी घेतली पाहिजे, असे टोपे यावेळी म्हणाले.
नियमांचे पालन करण्याचे आवाहन -
कोरोनाची तिसरी लाट थांबवायची असेल तर नियमाचे पालन करावे, निर्बंध शिथील केले असले तरी नियमांचे काटेकोरपणे सर्वांनी पालन करावे असे आवाहन यावेळी टोपे यांनी राज्यातील जनतेला केले.
दररोज 15 लाखांपर्यंत लसीकरण करण्याची तयारी -
महाराष्ट्राने एका दिवशीत 9 लाख 36 हजार लसीकरण करण्याचा विक्रम केलेला आहे. केंद्राने जर आपल्याला लसी जर मोठ्या प्रमाणात पुरवल्या तर दररोज 15 लाखांपर्यंत लसीकरण करण्याची आपली तयारी आहे, असेही टोपे यावेळी म्हणाले.
हेही वाचा - धक्कादायक! नाशिकमधील प्रांताधिकाऱ्याची नियत घसरली, तलाठी महिलेकडे शरीर सुखाची मागणी
