बुलडाणा - राज्यातील सर्व हातगाड्यांवरील अन्न पदार्थ विक्रेत्यांना ड्रेस कोड लागू करण्यात येत आहे. या मोहिमेची सुरुवात सोमवारी शहरातून करण्यात आली. यावेळी राज्याचे अन्न व औषध प्रशासन मंत्री तथा जिल्ह्याचे पालकमंत्री डॉ. राजेंद्र शिंगणे यांनी शहरातील चिंचोले चौक आणि चौपाटी येथील खाद्यपदार्थ विक्रेत्यांना अ‌ॅप्रॉन आणि हातमोजांचे वाटप केले. तसेच विक्रेत्यांच्या हातांची, नखांची स्वच्छतेच्या दृष्टीकोनातून तपासणी करीत त्यांचे परवानेही तपासले.
राज्याचे अन्न व औषध प्रशासन मंत्री डॉ. राजेंद्र शिंगणे यांच्या पुढाकारातून व संकल्पनेतून संपूर्ण राज्यात अन्न पदार्थविक्रेत्यांना ड्रेसकोड देण्यात येणार आहे. यावेळी सर्व हातगाडीवरील अन्न पदार्थांची विक्री करणाऱ्या विक्रेत्यांनी चांगल्या व स्वच्छ वातावरणात विक्री करावी. त्यासाठी सर्वांनी स्वच्छता पाळावी. यापुढे अन्न व औषध प्रशासन विभाग राज्यात हातगाड्या तपासण्याची मोहीम राबविणार आहे. यामध्ये हातगाडीवरील विक्रेत्यांना अन्न पदार्थांची विक्री करताना अ‌ॅप्रोन, हातमोजे व कॅप घालणे बंधनकारक असणार आहे. यापुढे अन्न पदार्थांची विक्री करताना हातमोज्यांचा वापर सक्तीने करावे. याचा वापर न करणाऱ्यांवर दंडात्मक कारवाई करण्याचा इशारा अन्न व औषध प्रशासन मंत्री डॉ. राजेंद्र शिंगणे यांनी दिला आहे.
