बुलडाणा - नेहमी आपल्या कविता ऐकवून, स्वतःला चर्चेत ठेवणारे केंद्रीय मंत्री रामदास आठवले यांनी, संयुक्त महाराष्ट्राच्या नवनिर्मितीमध्ये आपले मोलाचे योगदान देणाऱ्या लोकशाहीर अण्णाभाऊ साठे यांच्या गीताचे विडंबन केले होते. तर, पत्रकारांशी बोलताना मध्येच बँड वाजवला म्हणून वाजंत्रीना शिवीगाळ केली होती. या घटनांचा बुलडाणा जिल्ह्यात ठिकठिकाणी निषेध व्यक्त करत, बुलडाणा तालुक्यातील कोलवड या गावात आठवले यांच्या प्रतिमेला चपलांचे हार घालून जाळण्यात आले.
कोलवड येथे अॅड. प्रकाश गायकवाड, संजय तोताराम गायकवाड यांच्या नेतृत्वामध्ये सदर आंदोलन करण्यात आले. यावेळी शेकडोंच्या संख्येने मातंग समाजातील बांधव सहभागी होते. या आंदोलनात आठवलेंच्या प्रतिमेला भर रस्त्यात चपलांचा हार घालण्यात आला. तसेच, त्यांची प्रतिमा समाजाच्या वतीने जाळण्यात आली. तर दुसरीकडे मलकापूर, मोताळा येथे तहसीलदारांमार्फत केंद्र सरकारकडे निवेदन सादर करून आठवलेंवर कठोर कारवाईची मागणी करण्यात आली.
