जिजाऊंच्या जिल्ह्यातच महिला बचत गटाच्या मेळाव्यात रंगला चक्क लावणीचा फड..

महिला बचत गटांना प्रोत्साहन देण्यासाठी तसेच त्यांनी निर्मित केलेल्या विविध वस्तू आणि कलाकृतींना बाजारपेठ उपलब्ध करून देण्यासाठी खामगावच्या पालिका मैदानावर हा मेळावा आयोजित करण्यात आला होता.

बुलडाणा - महिला बचत गटांना प्रोत्साहन देण्यासाठी खामगाव येथे दिवगंत पांडुरंग फुंडकर यांच्या जयंती सप्ताह निमित्त 'खानथडी जत्रा' नावाने मेळावा घेण्यात आला. हा मेळावा 4 सप्टेंबर ते 7 सप्टेंबर रोजी आयोजित केला होता. मात्र, या जत्रेत आयोजकांचीच 'जत्रा' झाल्याचा आरोप काँग्रेसने केला आहे. यावेळी शासनाचे 55 लाख रुपये घश्यात घालून भाजपचा केल्याचा आरोप देखील काँग्रेसचे नेते दिलीपकुमार सानंदा यांनी केला आहे.

हेही वाचा - प्रेम प्रकरणातून हाणामारी करणाऱ्या दोन प्रियकरांना अटक, पिस्तुलासह कोयता जप्त

तर काँगेसच्या माजी नगराध्यक्षा सरस्वती खाचने यांनी देखील माँ जिजाऊंच्या जिल्ह्यात महिला बचतगटाच्या मेळाव्यामध्ये सांस्कृतिक कार्यक्रमाच्या नावाखाली लावणीचा कार्यक्रम ठेवल्यामुळे निषेध नोंदवला. तर आयोजकांकडून नियोजन अभावचा फटका या जत्रेमध्ये आलेल्या महिला बचत गटांना बसला आहे. मेळाव्याच्या पहिल्याच दिवशी नियोजनाच्या अभावामुळे आणि सुविधा नसल्याने काही महिला स्टॉल न लावताच निघून गेल्या. त्यामुळे या प्रदर्शनाकडे नागरिकांनी पाठ फिरवली. त्यामुळे प्रदर्शनात 85 गटांपैकी फक्त 26 स्टॉलच उरले आहेत.

महिला बचत गटांना प्रोत्साहन देण्यासाठी तसेच त्यांनी निर्मित केलेल्या विविध वस्तू आणि कलाकृतींना बाजारपेठ उपलब्ध करून देण्यासाठी खामगावच्या पालिका मैदानावर हा मेळावा आयोजित करण्यात आला होता. यासाठी मैदानावर 130 स्टॉल्स उभारण्यात आले होते. महिलांना रोजगार उपलब्ध करून देण्यासाठी हा महोत्सव आयोजीत करण्यात आला होता. मात्र, या ठिकाणी महिलांसाठी कोणतेही नियोजन करण्यात आले नव्हते. त्यामुळे काही महिला स्टॉल न लावताच परतल्या. यावेळी बचत गटाच्या महिला चांगल्याच संतापल्या होत्या. विशेष म्हणजे महिला बचतगटाच्या मेळाव्यामध्ये रात्रीच्या वेळी सांस्कृतिक कार्यक्रमाच्या नावाखाली पुरुषाकरीता लावणीचा कार्यक्रम ठेवण्यात आला. त्यामुळे महिलांनी तीव्र नाराजी व्यक्त केली.

हेही वाचा - बुलडाणा शहरानजीकच्या गिरडा जंगलात आढळले शेकडो कुत्र्यांचे मृतदेह

खामगावचे माजी आमदार दिलीप सानंदा यांना या प्रकाराची माहिती मिळताच त्यांनी बचत गट प्रदर्शनीची पाहणी केली. त्यावेळी महिलांनी आपल्या व्यथा सानंदासमोर मांडल्या. त्यामुळे महिलांनी केलेल्या तक्रारींकडे आयोजकांनी जाणूनबुजून दुर्लक्ष केल्याचा आरोप माजी आमदार सानंदा यांनी केलाय. शिवाय शासनाकडून म्हणजेच आमदार निधीतून महिला बचत गटासाठी 55 लाख रुपये निधी मंजूर करून आयोजकांनी घशात घातल्याचा आरोप सानंदा यांनी केलाय.

तर बचत गटाच्या प्रदर्शनासाठी शासनाकडून 55 लाख रुपये निधी हा खर्चासाठी मंजूर झाला. बचत गटांना सर्व सुविधा देण्यात आल्या आहेत, असे नगरपालिकचे उपमुख्याधिकारी रवींद्र सूर्यवंशी यांनी सांगितले. शिवाय या ठिकाणी फक्त सांस्कृतिक आणि मनोरंजाचेच कार्यक्रम झाले असल्याचे सांगत सावरा-सावर करण्याचा प्रयत्न केला.

त्यामुळे बचत गटांची प्रदर्शनी बचत गटांना प्रोत्साहन देण्यासाठी आयोजित करण्यात आली होती का? प्रशासन आणि सत्ताधाऱ्यांचे खिसे भरण्यासाठी? असा प्रश्न सर्वसामान्य नागरिकांना पडला आहे. त्यामुळे आयोजकांवर तत्काळ कारवाई व्हावी, अशी मागणी बचत गटांनी केली आहे.