बुलडाणा- लोकसभा मतदारसंघात18 एप्रिल रोजी मतदान पार पडले. या मतदानाची मोजणी 23 मे रोजी औद्योगिक प्रशिक्षण संस्था, मलकापूर रोड येथे सकाळी 8 वाजेपासून सुरू होणार आहे. याकरीता जिल्हा प्रशासन सज्ज झाले असून मतमोजणी केंद्रामधील कक्ष सुसज्ज करण्यात आले आहेत.
मतमोजणीसाठी विधासनभा मतदारसंघनिहाय 6 विभाग करण्यात आले आहेत. या मतमोजणीच्या 25 फेऱ्या होणार आहेत. सर्वप्रथम पोस्टल व इटीबीपीएस (इलेक्ट्रॉनिकली ट्रान्सफर बॅलेट पेपर सिस्टीम) मतमोजणी होणार आहे. त्यानंतर इव्हिएममधील मतदानाची मोजणी सुरू होईल. सर्वात शेवटी विधानसभा मतदारसंघनिहाय पाच मतदान केंद्रांमधील व्हिव्हिपॅटची तपासणी करण्यात येणार आहे. त्यानंतर मतमोजणीसाठी विधानसभा मतदारसंघनिहाय 14 टेबल राहणार आहे. तसेच पोस्टल बॅलेट व इटीबीपीएसकरीता 10 टेबल असणार आहे. व्हिव्हिपॅटसाठी एक टेबल असून अशाप्रकारे एकूण 95 टेबल असणार आहे.
संपूर्ण मतमोजणी कक्षात 32 सीसीटीव्ही कॅमेरे बसवण्यात आले आहेत. मतमोजणीसाठी दोन केंद्रीय निवडणूक निरीक्षक असणार आहेत. एका विधानसभा मतदारसंघाकरीता 42 कर्मचारी असणार आहे. अशाप्रकारे सहा विधानसभा मतदारसंघासाठी 252 कर्मचारी राहणार असून इटीबीपीएस मतपत्रिकांच्या स्कॅनिंग करीता दोन टेबलवर 10 कर्मचारी असणार आहे. विधानसभा मतदारसंघनिहाय 70 कर्मचाऱ्यांची नियुक्ती करण्यात आली आहे. याप्रमाणे 420 कर्मचारी 6 विधानसभा मतदारसंघासाठी असणार आहे. त्यानंतर जिल्हाधिकारी कार्यालयाचे जवळपास 200 कर्मचारी मतमोजणीच्या प्रक्रियेत आहेत. त्याशिवाय सुरक्षेच्या दृष्टीकोनातून 150 पोलीस कर्मचारी मतमोजणी कक्षात असणार आहेत. तर 180 पोलीस कर्मचारी मतमोजणी कक्षाबाहेर नियुक्त करण्यात येणार आहेत.
मतमोजणी केंद्रात विविध कक्षांची स्थापना करण्यात आली आहे. त्यामध्ये संदेशवहन, माध्यम, फेरीनिहाय मतदान केंद्रनिहाय मतमोजणी संकलन, मानधन वितरण, इटिबीपीएस मतमोजणी पत्रिका स्कॅनिंग, इटिबीपीएस मतपत्रिका मोजणी, टपाली मतपत्रिका तपासणी, व्हिव्हिपॅट मोजणीसाठी तयारी, सुरक्षा, मतमोजणीनंतर सीयु/बीयु/व्हिव्हिपॅट, लिफाफे संकलन, स्टेशनरी, सिलींग कक्ष, संदेश वहन कक्ष, सार्वजनिक संदेशवहन कक्ष, सीक्रेट सील कक्षांचा समावेश असणार आहे.
