बुलडाणा - कोंबड्यामुळे कोरोना होतो, या अफवेमुळे बहुतांश नागरिकांनी चिकन व अंडी खाणे जवळपास टाळले होते. परिणामी अनेकांनी आपल्या कोंबड्या जिवंत गाडल्या. यात त्यांचे मोठे नुकसान झाले. मात्र आता कोरोना संसर्गात अंडी लाभदायक असल्याचे समोर आले आहे. यामुळे अंड्यांची मागणी वाढली आणि पोल्ट्री फार्मवाल्यांना 'अच्छे दिन' आले आहेत.
बुलडाणा जिल्ह्यातील किन्होळा गावात शेतकरी अरुण बाहेकर राहतात. त्यांची ५ एकर शेती आहे. पण त्यांना त्या शेतीत मागील चार वर्षांपासून फायदाच झाला नाही. कारण पावसाच्या अनियमिततेमुळे तोंडाशी आलेले पीक अनेकवेळा वाया गेले. यावर त्यांनी शेतीवर पूरक व्यवसाय म्हणून पोल्ट्री फार्म उभारला. यात त्यांना सुरुवातीला नुकसान झाले.
अशात कोरोना संसर्गाने धुमाकूळ घातला आणि कोंबड्यांमुळे कोरोना होतो ही अफवा पसरली. यात देखील अरुण यांचे प्रचंड नुकसान झाले. पण ते डगमगले नाही. त्यांनी आपला व्यवसाय नेटाने सुरू ठेवला. कालांतराने या महामारीच्या परिस्थितीत अंडी खाल्याने प्रतिकार शक्ती वाढते ही बाब समोर आली आणि अंड्याची मागणी वाढली. यामुळे अरुण यांना आता चांगलाच फायदा मिळू लागला आहे.
अरुण बाहेकर यांनी तीन हजार कोंबड्या पाळल्या आहेत. या कोंबड्यानी दिलेल्या अंड्यांद्वारे अरुण यांना महिन्याकाठी ६० ते ७० हजार रुपयांचा निव्वळ नफा होत आहे. ते अंड्याची विक्री व्यापाऱ्याला न करता थेट ग्राहकाला करत आहेत. यामुळे त्यांना जास्तीचे पैसे मिळत आहेत. शेतकऱ्यांनी आपल्या शेतीला पूरक व्यवसाय करावे, असे आवाहन अरुण यांनी इतर शेतकऱ्यांना केले आहे.
हेही वाचा - खटल्याची 'फी' माफ करतो म्हणत वकिलाचा महिलेवर बलात्कार
हेही वाचा - 'केंद्राच्या कृषी विधेयकाने शेतकऱ्यांचे उत्पन्न वाढेल, विरोधक दिशाभूल करीत आहेत'
