बुलडाणा - गेल्या 9 दिवसांपासून उपचार घेत असलेल्या 6 वर्षीय मुलाचा रेनबो बाल रुग्णालयात अचानक मृत्यू झाल्याने मुलाच्या नातेवाईकांनी बालरोग तज्ञ डॉ.जयसिंग मेहेर यांना रुग्णालयात मारहाण केल्याची घटना शुक्रवारी (29 ऑगस्ट)ला घडली. या प्रकारात डॉक्टरांच्या हलगर्जीपणामुळे मुलाचा मृत्यू झाल्याचा आरोप मृताच्या नातेवाईकांना केला आहे. मृत पावलेल्या मुलाचे नाव सोहम सुभाष डाबेराव असून, तो नांदुरा तालुक्यातील टाकरखेड येथील राहवासी आहे.
संबंधित प्रकरणाची माहिती मिळताच पोलीस निरीक्षक शिवाजी कांबळे यांनी घटनास्थळी दाखल होऊन परिस्थितीवर नियंत्रण मिळविले. या प्रकरणाच्या पुढील चौकशीसाठी पोलिसांनी उपचाराची कागदपत्रे ताब्यात घेतली आहेत. या बालकाचे शवविच्छेदन करण्यात आले असून, आकस्मित मृत्यूची नोंद करण्यात आली आहे. मृताच्या नातेवाईकांनी डॉक्टरांविरोधात अद्याप तक्रार नोंदवली नसून, मृत्युचे कारण समोर येण्यासाठी जिल्हा शल्यचिकित्सक समितीमार्फत चौकशी करण्याचे आदेश पोलिसांनी दिले आहेत.
हेही वाचा: बुलडाणा : श्रावण सोमवारनिमित्त जटाशंकर दर्शनाला गेलेला तरुण शिवणी तलावात बुडाला
याप्रकरणी रेनबो रुग्णालयातील डॉक्टरांची प्रतिक्रिया जाणून घेण्याचा प्रयत्न केल्यानंतर त्यांनी माध्यमांशी बोलण्यास नकार दिला आहे.
संबंधित घटनेमुळे रुग्णालयात भरती असलेल्य रुग्णांसह त्याच्या नातेवाईकांनी रुग्णालयातून काढता पाय घेतला.
काय आहे प्रकरण...
टाकरखेड येथील सुभाष डाबेराव यांनी आपल्या 6 वर्षाच्या मुलाला जांभरुळ रोड वरील बालरोगतज्ञ डॉ.जयसिंग मेहेर यांच्या खासगी रुग्णालयात 21 ऑगस्टला उपचारासाठी दाखल केले होते. मात्र, 25 ऑगस्ट पर्यंत सोहमच्या प्रकृतीमध्ये सुधारणा न झाल्याने त्याला डॉ. पंजाब हिरे यांच्या इस्पितळात दाखल करण्यात आले. दरम्यान, शुक्रवारी 29 ऑगस्टला औषधोपचारानंतर सोहमची प्रकृती सुधारली. परंतु, यानंतर रुग्णालय प्रशासनाने पुढील उपचार योग्यपद्धतीने न केल्याने रात्री 8 ते 9 च्या दरम्यान सोहमची प्रकृती खालावून त्याचा अचानक मृत्यू झाला.
हेही वाचा: बुलडाण्याच्या मासरुळमध्ये तरुणाची दगडाने ठेचून हत्या
मृत्यूची माहिती नातेवाईकांना मिळाल्यानंतर रेनबो रुग्णालयात तणावाची परिस्थिती तयार झाली. यावेळी अधिक माहिती देण्यासाठी आलेल्या डॉ.जयसिंग मेहेर यांना सोहमच्या नातेवाईकांनी मारहाण केली.
शहरातील बालरोगतज्ञ डॉ.पंजाब हिरे, डॉ.राजेंद्र बेदमूथा, डॉ.संजय हिवाळे आणि डॉ.जयसिंग मेहेर यांनी रेनबो बाल रुग्णालय सुरू केले आहे.
