भंडारा - मागील वर्षभरापासून भंडारा शहरातील जिल्हा परिषद ते खात रस्त्यावरील पथदिवे पूर्णपणे बंद आहेत. या मार्गावर नवीन रस्त्यांची निर्मिती झाली असून यासाठी जुने खांब काढून नवीन खांब लावण्यात आले. मात्र, नवीन जोडणी नगरपालिका करेल की कंत्राटदार, या वादामुळे हे पथदिवे गेल्या वर्षभरापासून पूर्णपणे बंद आहेत. पथदिवे बंद असल्याने संपूर्ण रस्त्यांवर अंधार असतो आणि त्यामुळे या रस्त्यांवर अपघाताच्याही बऱ्याच घटना घडल्या आहेत.
२ वर्षाआधी भंडारा शहराच्या जिल्हा परिषद चौकापासून नागपूर जिल्ह्याच्या रामटेक तालुक्यापर्यंत राष्ट्रीय महामार्गाच्या दुपदरीकरणाचे काम सुरू झाले होते. हे काम शहरात सुरू असताना खात रस्ता ते जिल्हा परिषद चौक परिसरातील पथदिव्यांची दोन्ही बाजूंची खांबे काढण्यात आली. त्यानंतर दुपदरीकरणाच्या मध्यभागी नवीन खांब बसविण्यात आले. या कामाला आता वर्ष पूर्ण झालं मात्र, अजूनही पथदिवे काही सुरू झाले नाही. खांबे बसविल्यानंतर त्यावर लाईट लागलेत, आवश्यक त्या सगळ्या वायर देखील जोडण्यात आल्या. फक्त त्याच्या विद्युतीकरणाची जोडणी बाकी असून इथेच सर्व प्रक्रिया येऊन थांबली आहे.
रस्त्यांसाठी जुने पथदिवे काढून नवीन पथदिवे कंत्राटदारांनी लावलेत, त्यामुळे ते सुरू करण्याची जबाबदारी ही त्या कंत्राटदाराची असल्याचे नगरपालिका प्रशासनातर्फे कंत्राटदारांना सांगण्यात आले. तर, माझे काम पथदिवे लावून देण्याचे होते ती सुरू करण्याची जबाबदारी ही नगरपालिकेची आहे असं कंत्राटदार सांगत आहेत. त्यांच्या याच वादामुळे मागील वर्षभरापासून पथदिवे लावून तयार असले तरी बंद अवस्थेत आहेत.
हेही वाचा - 31 डिसेंबरच्या आनंदावर पावसाचे विरजण, गारठा वाढला
पथदिवे बंद असलेल्या जिल्हा परिषद ते खात रोड रस्त्यांवर मोठ्या प्रमाणात वाहतूक आहे. शाळकरी विद्यार्थी, ग्रामीण भागातील मजूर, गावकरी, शासकीय कर्मचारी, व्यापारी, रुग्ण, सर्वांची या रस्त्यावरून रहदारी सुरू असते. मात्र, संध्याकाळी रस्त्यावर अंधार असल्यामुळे केवळ वाहनांच्या प्रकाशामध्ये पादचारी आणि सायकल चालवणारे कसेबसे प्रवास करतात. त्यामुळेच या रस्त्यांवर बरेच अपघात सातत्याने होत असतात. पण, एवढं होऊनही नागरिक शांत असल्याने नगरपालिका कुंभकरणाच्या झोपेत आहे.
हेही वाचा - भंडाऱ्यात 'या' ठिकाणी भरते नदीच्या मध्यभागी जत्रा
