शॉर्ट सर्किटमुळे सहा घरांना आग; घरगुती साहित्य जळाले, जनावरांचाही मृत्यू

तूमसर तालुक्यातील तुडका येथे मधुकर वाडीभस्मे यांच्या घरातील वीजेच्या मीटरची सर्व्हिस वायर शार्ट झाल्याने त्यांच्या घरासमवेत तीन घरांना आग लागल्याची घटना शनिवारी घडली. या आगीमुळे मोठे आर्थिक नुकसान झाले आहे.

भंडारा - तूमसर तालुक्यातील तुडका येथे मधुकर वाडीभस्मे यांच्या घरातील वीजेच्या मीटरची सर्व्हिस वायर शार्ट सर्किट झाल्याने त्यांच्या घरासमवेत तीन घरांना आग लागल्याची घटना शनिवारी घडली. आगीत त्यांच्या घरातील तांदूळ, गहू आणि इतर धान्य, जीवनोपयोगी साहित्य, कपडे, कागदपत्रे, सोने, चांदी अशा मौल्यवान वस्तू पूर्णत:जळून खाक झाल्या. या अग्नितांडवात मधुकर वाडीभस्मे यांच्या मालकीच्या 5 बकऱ्यांचाही होरपळून जागीच मृत्यू झाला असून लाखोंचे नुकसान झाले आहे.

दुपारच्या सुमारास सूर्य आग ओकत असताना आगीने रौद्र रूप धारण करत मधुकर वाडीभस्मे यांच्या घरालगतच्या कुंदा पंधरे, निलकंठ पंधरे, गोविंदा भिवगडे, गुणाबाई वाडीभस्मे, नंदराम भिवगडे, निलकंठ पंधरे यांच्या घरावर आगीचे लोळ उडाल्याने यांच्या घरातील साहित्य खाण्यापिण्या योग्य धान्यसाठा, गुरांचा गोठा आगीच्या भक्ष्यस्थानी आला. तसेच गुणाबाई वाडीभस्मे यांच्या घरच्या दोन बकऱ्यांचा तडफडून मृत्यू झाला. त्याशिवाय एक हिरो होंडा कंपनीची फॅशन-प्रो मोटरसायकल, घरालगत असलेली पान टपरी, घरातील धान्य, कपडे, कागदपत्रे, अग्नीतांडवात पूर्णत: जळून खाक झाली. यात मधुकर वाडीभस्मे यांचे मोठे नुकसान झाले आहे.

तुडका येथील सहा कुटुंबीयांचा संसार शार्ट सर्किटच्या अग्नितांडवाने उघड्यावर आला आहे. आगीवर नियंत्रणासाठी तूमसर येथील अग्निशामक दलाच्या गाडीला व शिवशंकर पडोळे, दिलीप पडोळे यांच्या पाण्याच्या टँकरला पाचारण करण्यात आले होते. घरांवरील आगीवर गावकर्‍यांच्या मदतीने आग आटोक्यात आणण्यात आली. मात्र, तोपर्यंत मोठे नुकसान झाले होते.

तलाठ्याने घटनास्थळी धाव घेत अग्नीतांडवात सहा घर मालकांचे 15 लाख रुपयांचे आर्थिक नुकसान झाले असल्याचा अहवाल शासनाला पाठवला आहे. घरमालकांना शासनाकडून त्वरीत आर्थिक मदत देण्याची मागणी येथील नागरिकांनी केली आहे.