भंडारा - नगरविकास आणि सार्वजनिक बांधकाम मंत्री एकनाथ शिंदे यांनी भंडारा जिल्हा सामान्य रुग्णालयाला आज भेट दिली. विषय अतिशय गंभीर असल्याने चौकशी निष्पक्ष होईल आणि लवकरच चौकशी अहवाल मिळेल, असे त्यांनी या वेळी सांगितले.
'अहवाल लवकरच'
शिवसेनेतर्फे 1 लाख रुपयांची मदत देण्यात येणार असल्याचे त्यांनी सांगितले. चौकशी अहवाल लवकरच मिळेल. शुक्रवारी भंडारा जिल्हा सामान्य रुग्णालयामध्ये बालकांच्या जळीत हत्याकांडाचा अहवाल अजूनही आलेला नाही. मात्र दररोज कोणीतरी नवीन मंत्री रुग्णालयाला भेट देण्यासाठी येत आहे. बुधवारी नगर विकास मंत्री एकनाथ शिंदे आले होते. त्यांनीसुद्धा आतापर्यंत आलेल्या इतर मंत्राप्रमाणे पाहणीचे काम केले. सुरुवातीला घटनास्थळी जाऊन चौकशी, पाहणी केली. नंतर जे बालक या घटनेत सुखरूप बचावले त्यांना भेट दिली. यावेळेस माध्यमांशी बोलताना त्यांना वारंवार एकच प्रश्न विचारला गेला आणि त्या प्रश्नाचे त्यांनी एकच उत्तर दिले, ते म्हणजे चौकशीचा अहवाल लवकरच पुढे येईल.
'दोषींवर कारवाई होणार'
विषय गंभीर असल्याने कुणालाही वाचवले जाणार नाही. ही घटना अतिशय गंभीर असून त्या अनुषंगाने वरिष्ठ अधिकाऱ्यांची चौकशी समिती बनवलेली आहे. ही समिती अतिशय गंभीरपणे विषयाला हाताळत आहे. त्यामुळे थोडासा उशीर होत आहे. लवकरच चौकशी अहवाल पूर्ण होऊन तो पुढे येईल आणि जे दोषी असतील, त्यांच्यावर कारवाई केली जाईल, असे ते म्हणाले.
मदतीसोबतच न्याय हवा
आतापर्यंत मुख्यमंत्री सहाय्यता निधीतून पाच लाख रुपये, पीएम निधीतून दोन लाख रुपये, राज्यपाल निधीतून दोन लाख रुपये आणि आज शिवसेनेतर्फे पुन्हा एक लाख रुपये देण्याची घोषणा करण्यात आली.
