बाजारात सोयाबीनची आवक वाढली; यंत्राद्वारे काढला जातोय सोयाबीनचा भाव

बाजारात विक्रीसाठी आलेल्या सोयाबीनचा भाव यंत्राद्वारे काढला जातो. सोयाबीनमधील आर्द्रता किती आहे, हे यंत्राद्वारे तपासूनच सोयाबीनचा भाव ठरत असल्याचे चित्र बीड जिल्ह्यात दिसत आहे.

बीड- बाजारात विक्रीसाठी आलेल्या सोयाबीनचा भाव यंत्राद्वारे काढला जातो. सोयाबीनमधील आर्द्रता किती आहे, हे यंत्राद्वारे तपासूनच सोयाबीनचा भाव ठरत असल्याचे चित्र बीड जिल्ह्यात पाहायला मिळते. जिल्ह्यातील काही भाग वगळता सोयाबीन उत्पादनाची स्थिती बरी आहे. त्यामुळे बाजारात सोयाबीनची मोठ्या प्रमाणात आवक होत असल्याचे व्यापारी गौतम नाईकवाडे यांनी सांगितले.

यंदा बीड जिल्ह्यात 2 लाख 41 हजार हेक्टर क्षेत्रावर सोयाबीनचा पेरा झालेला होता. सप्टेंबर महिन्याच्या शेवटी बीड जिल्ह्यात अतिवृष्टी झाल्यामुळे काही भागातील सोयाबीनचे पीक वाया गेले. मात्र, ज्या भागात सोयाबीन पिकाची स्थिती बरी आहे. तेथील सोयाबीन आता बाजारात विक्रीसाठी मोठ्या प्रमाणात येऊ लागले आहे. यंदा सोयाबीनला प्रति क्विंटल 3 हजार 500 ते 3 हजार 800 रुपयापर्यंत भाव मिळत आहे. येणाऱ्या काळात सोयाबीनचा भाव अजून वाढण्याची शक्यता आहे.

असा ठरतो सोयाबीनचा प्रतिक्विंटल भाव

सोयाबीन उत्पादक शेतकरी जेव्हा सोयाबीन विक्रीसाठी बाजारात घेऊन येतात. तेव्हा व्यापारी एका यंत्रामध्ये सोयाबीनच्या बिया टाकतात व एक बटन दाबतात या मशीनमध्ये संबंधित सोयाबीनच्या बियांमधील आर्द्रता (ओलेपणा) तपासला जातो. जर त्या बियांमध्ये अधिक आर्द्रता असेल तर भाव कमी मिळतो व जर आर्द्रता कमी असेल तर अधिक भाव मिळतो, असे व्यापारी गौतम नाईकवाडे म्हणाले.

हेही वाचा - बीड: चंदन चोरी प्रकरणी माजी नगरसेवकासह चौघांवर गुन्हा दाखल; एकाला अटक