बीड - जिल्ह्यातील 11 पैकी 10 पंचायत समितीच्या सभापती पदांच्या निवडी सोमवारी पार पडल्या. यामध्ये बीड पंचायत समितीवर आमदार संदीप क्षीरसागर यांनी वर्चस्व प्रस्थापित केले आहे. तर परळी पंचायत समितीवर मंत्री धनंजय मुंडे यांच्या गटाने आपली सत्ता कायम ठेवली आहे.
बीड पंचायत समितीच्या सभापतिपदी राष्ट्रवादी काँग्रेसच्या सारिका गवते तर उपसभापतिपदी शिवसेनेचे मकरंद उबाळे यांची वर्णी लागली आहे. बीड जिल्ह्यातील एकूण 10 पंचायत समित्यांचे सभापती निवडले गेले आहेत. पाटोदा पंचायत समितीच्या सभापती पदाची निवड मंगळवारी म्हणजेच 31 डिसेंबर रोजी होणार आहे.
हेही वाचा - बीडमध्ये खासगी बसला आग; चालकाच्या सतर्कतेमुळे सर्व प्रवासी सुखरूप
परळी पंचायत समितीमध्ये राष्ट्रवादी काँग्रेसच्या उर्मिला शशिकांत गीते या सभापती तर उपसभापतिपदी बालाजी मुंडे यांची वर्णी लागली आहे. विशेष म्हणजे सभापती व उपसभापती पदासाठी परळीत एकही अर्ज विरोधकांकडून दाखल न झाल्याने राष्ट्रवादी काँग्रेसचे वरील दोन्ही सभापती व उपसभापती घोषित करण्यात आले आहेत. एकंदरीत धनंजय मुंडे यांच्या गटाने परळी पंचायत समितीवर आपले वर्चस्व कायम ठेवले असून एकूण 12 पंचायत समिती सदस्यापैकी 8 पंचायत समिती सदस्य धनंजय मुंडे यांच्या गटाचे आहेत तर 4 पंकजा मुंडे यांच्या गटाचे पंचायत समिती सदस्य आहेत.
गेवराई पंचायत समिती भाजपच्या ताब्यात गेली आहे पूर्वी शिवसेनेचे गेवराई पंचायत समितीवर वर्चस्व होते. भाजपच्या कल्पना सुरवसे या सभापती तर संदीप लगड हे उपसभापती झाले आहेत.
हेही वाचा - आमदार प्रकाश सोळंके राजीनाम्याच्या तयारीत; मंत्रिपद डावलल्याने नाराजी कायम
आष्टी पंचायत समिती सभापती पद ओबीसी महिलेसाठी राखीव होते. सभापतीपदासाठी एकमेव अर्ज आला होता. परिणामी भाजपचे आमदार सुरेश धस यांच्या गटाच्या माधुरी जगताप यांची आष्टी पंचायत समितीच्या सभापती पदावर बिनविरोध निवड झाली आहे. तर उपसभापतीदी गणेश तांदळे यांची वर्णी लागली आहे.
अंबाजोगाई पंचायत समितीच्या सभापतीपदी काँग्रेसच्या विजयमाला जगताप यांची बिनविरोध निवड झाली. तर राष्ट्रवादीच्या आलिशान पटेल यांची उपसभापती म्हणून बिनविरोध निवड झाली आहे. निवडणूक निर्णय अधिकारी म्हणून उपजिल्हाधिकारी शोभा जाधव यांनी काम पाहिले. तर शिरूर कासार पंचायत समितीच्या सभापतीपदी उषा विजय सरवदे यांची निवड झाली.
- 'पाटोदा'ची निवड प्रक्रिया अचानक झाली रद्द-
पाटोदा पंचायत समिती निवडप्रक्रियेपूर्वी इच्छुक उमेदवारांनी पंचायत समितीत येऊन आपल्या नावांचा अर्ज दाखल करणे आवश्यक होते. दुपारी बारापर्यंतची वेळ नामांकन अर्ज दाखल करण्यासाठी दिली होती. मात्र, 12 वाजेपर्यंत कोणीच न आल्याने 12 वाजून 5 मिनिटांनी निवड निर्णय अधिकाऱ्यांनी सभापती निवड प्रक्रिया 1 दिवसाने पुढे ढकलली. म्हणजेच मंगळवारी 31 डिसेंबरला पाटोदा येथील पंचायत समिती सभापती व उपसभापती निवडण्यात येणार आहे.
केज पंचायत समिती भाजपच्या ताब्यात कायम आहे. येथे ओबीसीच्या परीमळा विश्वनाथ घुले या सभापती तर उपसभापती म्हणून ऋषिकेश आडसकर यांची निवड करण्यात आली आहे. पंचायत समितीत एकूण 12 पंचायत समिती सदस्य आहेत. यापैकी 7 भाजपकडे तर 5 राष्ट्रवादी काँग्रेसकडे आहेत.
बीड जिल्ह्यातील सर्वात छोटी पंचायत समिती असलेली वडवणी पंचायत समितीवर राष्ट्रवादी काँग्रेसने आपले वर्चस्व प्रस्थापित केले आहे. अंजना बळीराम आजबे या राष्ट्रवादी काँग्रेसच्या सभापती झाल्या आहेत. तर उपसभापती श्रद्धा सुमित उजगरे या झाल्या आहेत. एकूण 4 पंचायत समिती सदस्यांची वडवणी पंचायत समिती आहे. यामध्ये 3 राष्ट्रवादी काँग्रेसचे तरी 1 भारतीय जनता पार्टीचा पंचायत समिती सदस्य आहे.
माजलगाव पंचायत समिती सभापती पद बिनविरोध राष्ट्रवादी काँग्रेसकडे राहिले आहे. एकूण 12 पंचायत समिती सदस्यांची माजलगाव पंचायत समिती आहे. येथील सभापती ओबीसी महिला सोनाली खुळे तर उपसभापती डॉ. वसीम मनसुभदार हे झाले आहेत.
